Zothan Autoworks Pro Volleyball League 2022 a mipa semi-final khel tur an hriat kim tawh a. Inrinni zanah Thutak Nunpuitu Team tlawm mahse palina ni turin an tling chiang.
R Dengthuama Indoor Stadium-ah TNT leh Durtlang North an inkhel a. Durtlang North hian inringtawk takin an khel tluan a, 25-20, 25-18, 17-25, 26-24 (3-1) a chakin pathumna niin league an khar.
Chiang taka vawi hnih an tlawm zawn hnuah khairual zawk leh tlo tha takin khelmualah an kir leh a, Sagar Malik, Fabian Lallunghnema leh Lalbiakmuana mai bakah Vanlalṭanpuia leh Vanlalmawia’n hlawk thamin an khel.
Set hmasa pahnih an lak zawn hnuah set thumnaah an che fuh hleithei lova, mahse inrintawkna hloh lovin infuihphur tawnin set lina inelnaah sangah team hriam zawk an nihna lantirin fiahna an pal tlang. 2019-a final lut Durtlang North-in boruak thar hap chungin semifinal-ah league-a an hneh loh tawh Tuichangral an hmachhawn dawn a, a zawna final lut turin beiseina an nei sang thar hle.
TNT-in an khelh hnuhnun vawi hniha an tlawm zawn tawhna chhan let tumin hmasawnna an lantir na a, an player pawimawhten tawn hriat an tlakchham rualin boruak sangah an tlo tawk lo va, inelna tak takah a bet zawkah tangin league vawi li an khelhah a tum thum nan an tlawm.
Pro Volleyball-a a tel hmasak berah Vanlalṭanchhana’n a tum hnih nan D3 Business Player of the Night lawmman a dawng a, Mizo player zinga langsar ni mekin point 29 hmuin 10 a hloh.
Zirtawpni zanah Semifinal lut sa chunga khel Tuichangralin tha takin league hmawr an bawk a, Sahil Kumar leh Saidingpuia’n team tanpuiin 25-23, 25-21, 26-24 (3-0) in Chhinga Veng Spikers an hneh.
Champion lai Chhinga Veng Spikers-in an zahawmna humhim zo lovin championship an thlah liam a, league vawi li an khelhah an tlawm vek.
Hun pawimawhah Spikers an tang mar thei thin lova, inkhel boruak a sanlaiin an talbuai leh thin. An player Sujith Acharya chuan point 25 hmuin 12 a paih a, D3 Business Player of the Night lawmman dawng thung.