Chief Minister Pema Khandu chuan nimin khan China-in a puhna chhangin Arunachal Pradesh chu an ram angin chhal fo tawh thin mah se mipui leh Indian Army chu an hnungtawlh lo tih a sawi.
“Tun kum 1962 ni lovin 2020 a ni tawh a, thil a danglam tawh. Jammu & Kashmir atanga Arunachal Pradesh thlengin kan inbuatsaih tha a, a tul hunah chuan Arunachal mite hi Indian Army hnungah an ding zel ang,” tiin Khandu chuan nimin khan a sawi.
Chief minister hian India leh Tibet inrinaa inkalpawhna, Bum La a tlawh a. Ram tana nun hlantu, Param Vir Chakra Subedar Joginder Singh-a thihcham vawi 58-naah zahna hlanin ramria hmasawnna ruhrel dinte chuan Prime Minister Narendra Modi-a kaihhruai a rinngamzia a tilang tih a sawi.
“Ramri tihhmasawnna, a bikin kawng pawimawh tak tak siam hna hi kan state-ah chak taka thawh a ni a. Arunachal-ah hian heng hmasawnna hi kan hmuh belh zel dawn,” tiin Khandu chuan a sawi.
Kum 1962-a Indo-Sino indonaa thi, Subedar Singh-a hriatrengna atana ama hminga war memorial siam thar chu a fanu, Kulwant Kaur chuan a hawng bawk.
He hriatrengna hi Arunachal Pradesh sorkarin IB Ridge hnuaiah Singh-a inpekna hriatrengna atana a siam a ni.
Nimina hun hmannaah hian MLA Tsering Tashi, Phurpa Tsering, Jambey Tashi leh Indian Army-a hotu lian tak takte an tel.