Mizoram sorkarin nikum November thla khan Plastic Waste Management Amendment Rules, 2021 hmangin hman khat chauh daih plastic (single use plastic) hman khapna thupek a chhuah a, dan bawhchhiate chu Rs nuai 1 leh lung in tan thlengin hrem theih ni mah se Mizoram tibuai mektu, plastic khapna thupek hian zawm a la hlawh tawk lo.
Mizoram Pollution Control Board-a Member Secretary C Lalduhawma chuan plastic-in environment a tichhiat nasat avangin India ram pumah hman khat chauh daih plastic chu siam chhuah, zawrh, lei leh hman a khap a, chumi zul chuan Mizoram sorkar pawhin khapna thupek a tichhuak tih The Zozam Times a hrilh.
UD&PA department-in plastic hman khapna thupek a tihchhuahah dan bawhchhiate chu Environment Protection Act hnuaiah Rs nuai 1 chawi leh kum nga lung in tan thlengin a hrem theih tih leh dan bawhchhe lui ngar ngarte chu ni tin Rs 5,000 chawi tura hrem tur an nih thu a tar lang.
He khapna thupek bawhchhiate sum chawi tur hi thahnemin a hremna hi nep lo hle mah se vantlang erawhin khapna thupek hi an la zawm tawk lo hle niin C Lalduhawma chuan a sawi.
Aizawl leh hmun dangah pawh dawrkaiten plastic leh a kaihhnawih an la zuar nasa hle tih sawiin, “Dawrah lei tur awm lo se chuan kan hmang tlem deuh tura ngaih a ni a, sumdawngte hian khap a ni tih an hre lo pawh a ni thei a, hre reng chungin an zuar lui pawh a ni thei a, tun dinhmunah chuan he khapna hian zawm a hlawh lo,” a ti.
Mizoram sorkar hnuaia department hrang hrang office-ahte hman khat chauh daih plastic hman khapna chu tun hnai khan General Administration Department (GAD)-in a tichhuak tih sawiin, sorkar office hrang hrangte pawh single use plastic free-a puang zel tura hma lak a nih thu a sawi bakah tun dinhmunah department 10 vel zetin plastic free-ah an inpuang tawh tih a sawi.
Plastic chu khap a nih vang ngawt ni loin ram leilung tichhiaa ramngaw leh lui dung tibawlhhlawhtu a nih avang zawkin hman duh lohna thinlung neih a tul thu a sawi a, tun ang renga plastic hi hman luih a niha hmun remchangah thehthang zel a nih chuan Mizoram environment chu a la tichhe nasa zual thei tih a sawi bawk a ni.