Bayern Munich chuan Dutch champion Ajax Amsterdam tana khel Morocco international Noussair Mazraoui chu an lakluh thu an puang.
Kum 24 mi Mazraoui hi June thla a contract hmang zo tur a ni a. Bundesliga champion hian a contract zawh hunah free transfer in an lalut ang.
Ajax right-back hian kum 2026 thleng Bayern Munich hnenah contract a ziak a. German club in Ajax atanga tun nipui a player lakluh an duh pahnih zinga pakhat niin Bayern hian midfielder Ryan Gravenberch an la ngaihven zui mek.
Bayern Munich in tun nipuiah an tlarhnung thuam that an duh a, centre-back Niklas Sule chuan Borussia Dortmund a zawm dawn. Hei vang hian France international Benjamin Pavard in ding lamah chhawr thin mahse a laiah a tuldan anga khelhtir theih a ni a, coach Julian Nagelsmann chuan dinglam a khel tur player duhthlan tur neih belh a duh.
Netherlands a piang Mazraoui hian Ajax hi kum 8 a nihin a zawm a, an academy chhuak niin kum 2018 khan first team tan a inkhel tan.
Ajax tana a khelh chhungin inelna hrang hrangah vawi 137 a inlan hman a, goal 10 a khung a. Eredivisie title vawi thum a chawi hman.
KNVB Cup vawi hnih chawiin kum 2019 a UEFA Champions League semi-final thleng thei Erik ten Hag-a hnuaia Ajax team fak hlawh tak ami a ni bawk.