Central Young Lai Association (CYLA)-in Lawngtlai District Hospital-a doctor pali te sawnna thupek sut tur leh doctor dang dah belh zawk tura an ngenna kalzelah vawiin hian Lawngtlai leh Bungtlang South-ah sorkar pisa, zirna in leh bank-a kal tur te dan an tum a, hemi chhung hian sorkar hnuaia hmasawnna hna thawk mektute pawh chawl turin an ngen.
CYLA hruaitute chuan nimin khan Lawngtlai Press Club-ah thuthar thehdarhtute kawmin, sorkar laka beisei an neih chungchanga an ruahmannate hi an puang a. Lawngtlai District Hospital-a doctor indaihlohna a nasat thu Chief Minister Zoramthanga hnenah ziak leh tawngkaa an thlen tawh thu leh doctor pali – Gynaecologist, Pediatrician, General Surgeon leh Eye Specialist te dah belh tura an ngen thu an sawi.
Doctor indiahlohna avanga doctor dah belh tura an dil mek laia a awmsa pali sawnchhuaka, midang pathum dahluh an ni chu hriatthiam theih a ni loh thu CYLA hruaitute chuan an sawi a. “Nunphung pangngaiah pawh district hnufual, mipui tamna a nih avanga doctor indaihlohna a nasat laiin, Myanmar ram buai vanga raltlan mi singkhat vel Lawngtlai district-in a kawl lai, doctor mamawhna a san zual laia doctor pali sawnchhuaka midang pathum dah an ni hi district mipuite zahlohnaah kan ngai a ni” an ti.
Mizoram sorkar chuan tun thla ni 20 khan Lawngtlai district hospital-a doctor pahnih sawnna thupek ticchhuakin, tun thla vek ni 23-ah he damdawi in-a thawklai bawk doctor dang pahnih sawnna thupek tichhuak lehin, midang pathum Lawngtlai district hospital-a dahna thupek a tichhuak bawk a ni.