Hertha Berlin chuan season thar a Bundesliga khel chhunzawm turin hnehna pawimawh an chang a. Bundesliga promotion-relegation playoff-ah Hamburger SV lehthal in 2-1 aggregate in an chak.
Bundesliga promotion-releation playoff-ah hian Bundesliga a 16-na leh 2.Bundesliga a pathumna te an inkhel thin a. First leg-ah Hertha Berlin hi an mualah 1-0 in an tlawm a. Hamburg tan Ludovit Reis chuan goal a khung.
Hamburg a Volksparkstadion a inkhelah erawh tum nei ran in Hertha Berlin an khel a. Minute 4-naah goal an khung nghal.
Hertha tan captain Detryck Boyata chuan goal a khung a, Marvin Plattenhardt-a corner vawrh luh chu goal-ah a tauh lut.
Second half ah Plattenhardt-a’n an goal hnihna a khung a. Goal sir kil angreng tak atangin freekick a pet kual lut a. Hamburg goalkeeper Daniel Fernandes chu insiamrem hman lovin goal-ah a lut mawi hle.
Inkhel boruak a sang a, team pahnihten German football a league sang ber a khelh ngei tumin theihtawp an chhuah. Huntawp hma in Hertha Berlin midfielder Lucas Tousart chu yellow card pek nawn a nih avangin hnawhchhuah a ni bawk.
A tawpah erawh Hamburg player ropui ni thin Felix Magath-a hnuaia khel Hertha Berlin in Bundesliga an khel leh dawn a. Greuther Fuerth leh Arminia Bielefeld te hnung an zui dawn lo.
Kum li chhung Bundesliga an khelh tawh loh hnuah Hamburg in kir leh an tumna a hlawhtling lova, champion Schalke )4 leh Werder Bremen te hnung an zui thei dawn lo ve thung.
Hertha Berlin coach kum 68 mi Magath hi German coach ropui niin player leh manager angin Bundesliga trophy vawi thum ve ve a chawi tawh a. Kumin March 13 khan nasa taka talbuai Hertha in an lalut.
Magath hian a hna a hlawhtlinpui hnuah club a chhuahsan tur thu a sawi chiang nghal a. “HSV in Bundesliga an khelhna tur daltu ka ni rilru ah thil tam tak a awm. Mahse ka hna ka hlen a, Bundesliga kan khel chhunzawm tur hian min ti hlim a, ka hna chu ka hlen ta e.” tiin a sawi.