Vun-ah
A sen tai hlar mai a, a thip/thak deuh bawk nen, khawi maw laia vung ang deuhte pawh hmuh tur a awm nawk a, hetiang hi thil thleng thina ngaih a nih avangin a zual zel lohnan nisa hnuaia kal loh a him. I kal chhuak dawn a nih pawhin nihliap emaw scarf emaw ken ngei ngei tur a ni a. Khaw lum/uap leh sa deuh hulh hulh hian vunah harsatna a thlen nasa hle a, sunscreen emaw lotion tha tak hnawih fo tur a ni a.
Tin, lacto calamine hnawih pawh a sualna a awm hran lo. A pawimawh bera chu, engtik lai pawha thianghlim taka vun enkawl hi a ni a, a khat tawka tihfai leh inbual thin tur a ni.
Arngeng
Tunhma lama hetianga harsatna i neih tawh chuan tuna naupai i tan chiah khan a zual sauh mai thei a, doctor thurawn leh enkawlna lak ngei ngei tur a ni. Hei mai bakah, face wash (mild) hmang thin la, tui hmanga siam moisturiser hman thin bawk tur a ni a, hei hian vun a ti mam thei.
Melasma
Hei hi biang chung vela awm thin vun dum sawina a ni a, nisa hnuaia invenna awm mumal lova awm thin vanga lo lang thin a ni. Hei hi naupai lai hian hormone hnathawh vang hrim hrim pawhin a awm thei bawk.
Engpawhnise, hetiang hi i hmaia a awm chuan nisa hnuai-a awm tam loh a tha anga, loh theih lohva kal chhuah angai a nih erawh chuan SPF 15 sunscreen lotion hnawih hmasak phawt tur.
Vun lam thiam Dr. Gunjan Shah chuan vun no sar tur chuan lime juice hnawih a tha a, Fu tui pawh hian mak danglam takin vun tan malsawmna a thlen thei bawk a ni a ti. Tin, fanghma pawh hi a tha hle a, pawn i chhuah hnu-a In i lo thlen veleh fanghma zai lep pahnih kha biang lehlam lehlamah dah la, mit chungah dah bawk la, a theih phei chuan hmai khat tlatah dah a pawi lem lo.
Vun thak
Naupai lai hian taksa pumah thak neuh neuh a awm thei a, hei pawh hi hormone rual khai loh vang bawk a ni thin. Damdawi hnawih leh ei tur chungchangah doctor thiam rawn ang che. Calamine lotion hi a tha hle niin mithiamte chuan an sawi.
Hmai dum leh duk
Hmai vela thil dum, bial deuh kulh hi a awm chawk thin a, a awmna lai vel kha fash wash (mild) hmanga silfai thin tur. Hemi hnu hian Neem hnahte pawh i bel thei a, bazar vela an zawrh neem lotion pawh hi an fak ang reng hle, lotion hi a ro veleh phih fai leh nghal mai tur.
Tin, almond oil leh lime bakah Fu te pawh hi hman a pawi lova, a dumna lai velah khan a tui hnawih a tha. Tin, doctor thurawn angin vitamin lam pawh i ei a ngai mei thei.
Vun inrin/rang
Vun-a inrinna awm thin (stretch mark) hi vawi leh khata taksa rihna a lo san hian a awm hma hle a. Dul, kawng bawr, leh mawngtam mai bakah hnute velahte a lo inlar nghal uar thin ang.
Hetiangah hi chuan fimkhur taka Vitamin E hmanga siam moisturiser te hi hunbi nei taka hnawih tur a ni.
Vun lam thiam Dr. Nishita Sheth chuan naupai hun a zawh hnu-ah micro-dermabrasion ang chi, cosmetic te hi stretch mark tihbo nan an hmang thin a. Amaherawh chu, hetianga i sawngbawl tak tak hma hian doctor remtihna lak phawt tur, a ti.
Sam tla leh Hmul
Naupai lai hian sam a tla hma thin hle a, hei pawh hi sawi leh sawi hnu- hormone hnathawh bawk a ni a. Hetiang hi a awm tam thin hle a nih chuan Iron leh Calcium hi doctor te’n an chawh thin a, heti chung pawha awmzia a awm lo a nih chuan Vun lam thiam doctor pan tur.
Tin, naupai atanga thla thum chhung hian sam chei (color) a him lova, naute-ah harsatna a thlen thei. Sam suk dawn paw’n tuilum ni lovin tui vawt hman tur a ni a, herbal shampoo (mild) hmanga chawlhkar khata vawi 3-4 vel suk a pawi lo. Sam a ro hulh loh nan almond emaw olive oil hnawih a tha.
Thil awm thin dang leh chu -Naupai lai hian taksa hmun hrang hrangah hmul a to chak em em thei tho tih hi a ni a, Dr. Mugdha Raut chuan, “Vun ziah hi a pawi loh rual rualin Shaving neih erawh fimkhur a pawimawh a, hliam emaw thi palh emaw a awm chuan nang leh naute tan a pawi thei,” a ti.