Mizoram Samagra Shiksha leh Central YMA ten nimin khan School Education Minister Office Chamber-ah thawhhona thuthlung an ziak a, School Education Minister Lalchhandama Ralte-in a hriatpui.
Lalchhandama Ralte chuan kum 2007 atanga Samagra Shiksha leh Central YMA-in zirna kawngah thawhhona an nei chho zel leh YMA kumpuan ram leh hnam humhalh a, a point pawimawh ah zirna uar tih telh ani chu lawmawm a tih thu a sawi.
Education minister chuan, “Zirna lamah kan san loh chuan ram leh hnam humhalh pawhin awmzia a neih theih lo a, All India service-a lut kan chatlak ta viau a, hei hi sorkar pawhin a vei a, thalai an tlin theih nan theihtawp a chhuah mek,” a ti.
Samagra Shiksha State Project Director Lalhmachhuana pawhin thu sawiin YMA nena thawhho tirh lamah sikul lut lo 24,000 chuang lai an awm tih sawiin, tunah chuan kum ruk leh 14 inkar hmeichhia 133 chauh an awm tawh a, thawhhonain rah a chhuah tih a sawi.
CYMA President R.Lalngheta pawhin thu sawiin Samagra nena YMA thawhhona chu a hun chhung a rei tawh a, YMA-in zirna angaih pawimawh thu a sawi.
Thawhhona thuthlungah hian YMA-in sikul kai rual, kai lo, dap chhuaha sikul kai tura fuih te, naupang rualbanlote laka rilru puthmang dik lo siam that te, YMA Group, Sub. Hqrs leh General Conference-ah zirna chungchang inhrilh ngun te, zirlaiten ngaihsan tur dik an ngaihsan a, hnualsuat tur dik an hnualsuat theih nana thawhho te, branch YMA-in hnam ziarang pawimawh, an huam chhung zirlai naupangte, zirtir thin te atel a, thawhhona thuthlung hian March 31, 2024 thleng a huam dawn a ni.
Thawhhona thuthlung ziahna ah hian School Education Secretary Dr Lalzirmawia Chhangte leh School Education Director Dr H.Lalthlangliana te, Samagra Shiksha Officer te leh Central YMA hruaitute an tel a ni.