Aizawl : Hachhek Bial Kuhva Chingtu Pawl (HBKCP)-in state dang aṭanga Mizorama Kuhva chi/Polypot lut ṭhin chu Kuhva tâm (Kuhva natna) thlentu pakhat nia an ngaih thu sawiin, hei hi an ngai thutak hle tih an sawi a. SEDP aṭanga sem tur Kuhva chi hmundang aṭanga Hachhek biala tam tak tawlhluh a ni pawh pawi an tih thu an sawi.
HBKCP chuan “Keimahni thar ngei, a chi atana ṭha tur bik kan zuah te ngei hi kan duhthusam a ni,” an ti a. Khaw hrang hranga association/society te pawh state dang aṭanga Kuhva chi lakluh kawngah fimkhur turin an inhriattir nghal niin an sawi bawk.
CYMA-in Myanmar lam aṭanga dan kalha Mizoram paltlanga Kuhva rah ro lakluhte dan ang taka kalpui a nih theihna tura hmalakna leh he hmalakna an duh loh thu an lo sawi tawh chungchangah pawh CYMA hruaitu ten hun remchang an siamsak thei a nih chuan vawiina Mamit sub-hqrs. rorel inkhawm karlakah hmaichhana inbiak ngei ṭha an tih thu an sawi a. Ramdang aṭanga Mizorama Kuhva lutin an eizawnna kawngah harsatnat a thlen nasa tih an sawi nawn.
HBKCP chuan fur/nipui Kuhva hralh kawnga an harsatna tawh pawh sawiin, Assam chanchinbu lamah Mizoram thar ni lova Foreign-a thar a nih rinhlelhawm tak a nih thu an tarlan avang leh chhan hrang hrang avangin Karimganja DC-in Mizoram aṭanga Assam-a lakluh khapna thupek a chhuah niin an sawi a. Hemi kawngah hian Mizoram sorkar chu theihtawpa hmalakpui tura an biak mek thu sawiin, Mamit Bawrhsap Lalnunnhlua leh SDO (Civil), Kawrthah Ngulzaṭhuama ten hma an lakpui avanga lawmawm an tih thu an sawi bawk.