World number one Novak Djokovic chuan a French Open champion title humhim turin Thawhtanni zanah bul a tan a. Awlsam takin hnehna a chang nghal.
Djokovic hian Japanese mi Yoshihito Nishioka a hmachhawn a. ourt Philippe Chatrier a inkhelah hian game li chauh hlohin 6-3 6-1 6-0 in hnehna a chang.
January thla a Australian Open atang Covid 19 hri danna a lak loh avanga an thawn haw Djokovic hian kuminah a vawikhatna atan Grand Slam inelna a hmachhawn.
Roland Garros-ah pawh hian a inlan thei dawn em tih zawhna a awm rei a, mahse March thla atang France in an ram inkhuahkhirhna a thlahdul hnuah a tan buaina awm lovin inelna a hmachhawn thei.
Kuminah Grand Slam title 20 la tawh Djokovic hian chetthat leh chetsual a fawm a, Monte Carlo leh Belgrade-ah te ATP Tour hnuaia inelnaah rin loh tak takin a tlawm a, kar hmasa a Italian Open-ah erawh set hloh miah lovin a champion.
Rome a a chetthat chu Roland Garros-ah chhunzawmin darkar hnih tling lovah Nishioka a hneh a. Set hmasa ber langsar taka khel lovin a la a, set hnihna leh set thumnaah erawh Nishioka tan el phak a ni lo.
“Ka inkhelah ka lungawi a awi a, kha bak duhthu han sam tur a awmin ka hre lo. Set hmasa berah khan ka insiamrem nghal mai thei lo. Player che rang tak a ni a, kan inthlauhna a tam lem lo. Mahse set hnihna leh thumnaah erawh ka che tha tluang hle.”
“Beisei sang tak nei chungin ka inkhel a, bul ka tan dan erawh duhthusam a ni. Tunhnaiah clay court a inkhelah ka che tha a, hei vang hian inrintawkna nena ka inkhel leh thei hi ka lawm a, nikum lama ka champion boruak pawh rilruah a la thi lo.” tiin a sawi.
Djokovic hian an kaltluang zel a nih chuan quarter-final ah French Open a player hlawhtling ber, Grand Slam title 21 la tawh Rafael Nadal a hmachhawn leh thei dawn a ni.
Tum 14-na atana champion tum Nadal hian Australian mi Jordan Thompson 6-2 6-2 6-2 in a hneh ve thung a. Kum 35 mi hi seeded number 5 ni lai niin French Open-ah hnehna a chan vawi 106-na chiah a ni bawk.
Nadal hian kum 2015 a champion Stan Wawrinka hnehtu tualchhung mi Corentin Moutet chu a hmachhawn leh ang.
“Vawiinah hnehna chang zawk ka ni hi ka lawm a, set thum a ka chak thei kha a lawmawm. Hmasawnna tur erawh ka nei zau hle.” tiin Nadal chuan a sawi.