North Korea chuan Nilaini tuk khan ballistic missile pathum a kap niin South Korean sipaite chuan an sawi.
Seoul-a thuneitute chuan missile-te hi darkar khat pawh tling lo chhungin Pyongyang-a Sunan atanga kah a nih thu an sawi.
North Korea-in missile a kah hi United States President Joe Biden-an Asia khawmualpui tlawha a zina a hawsan hnu lawkah a ni a, North Korea chu na zawka nawr a tul thu pawh a sawi.
North Korea hian kumthar tir atang khan ballistic missile hi a enchhin nasa hle a ni.
Japan pawhin Nilaini khan pahnih kah a nih thu an sawi a, a dang erawh an sawi lang lo.
Japan Defence Minister Nobuo Kishi chuan missile hmasa zawk hi km 300 chuang thlawkin km 550 vela sangah a thlawk niin a sawi a. A hnuhnung zawk hi km 50 vela sangah km 750 vela thui a thlawk niin a sawi bawk.
Kishi chuan missile kah a dem thu sawiin, ‘pawm theih loh, muanna, ngialnghehna leh Japan leh khawvel himna tiderthawng thei’ a nih thu a sawi.
Missile kah a nih hnua South Korea-a National Security Council thukhawm chuan hetiang thil thleng hi inpalzamna lian tak a ni tih an sawi tih presidential office chuan a sawi.
Thawhlehni zan khan ni nga thanga Asia a tlawh hnuah Biden-a chu an ram panin a chhuak a, a hnu lawkah missile hi enchhin a ni a. A zinnaah hian South Korea leh Japan a tlawh.
US leh South Korean thuneitute chuan North Korea hi a ralthuam enchhin turin an inring reng a, Biden-a cham lai pawhin a ni thei tih an lo sawi tawh.