Dawnfawh hralh theih loh hi Horti. Dept. in an mawhphurhnaah ngai rawh se
Tunlai hian Mizoram khawchhak lam khaw thenkhatin Dawnfawh tam tak thar chhuakin Aizawlah an rawn phur thla a. A bik takin Lamzawl khua chuan tih takzet a beiin a chingtute hian society hial an din a ni. Kum hmasa lama dawnfawh rate chhuta vaibelchhe thum man vel lai tur an thar hial. Lamzawl hian dawnfawh ching tur hian a chin dan zir turin Burma lama a ching thang, thiamsa an ruai hial niin an sawi. Hetianga hma la thei khua an awm hi an fakawm hle.
Amaherawh chu heng kuthnathawktute tharchhuah chu Burma lam dawnfawh in Aizawl bazarah a luahlan ta tlat a. An hralh thei lova. An mangang takzet a. An khuaah phei chuan an dah tawih nasa tawh hle tih thu an sawi bawk.
Bazar leh Aizawl khawpuia dawnfawh zuartute chuan Mizoram dawnfawh hi a tui lo bik a ni lova. Mahse an thar hun hi a tlai a ni, anni’n an thar hma in khawchhak lam atangin tam tak a lokal tawh a. Kan lo zuar rei tawh. Tun dinhmunah kan lakna kan thlak thut thei lo. Nakumah pawh an tharchhuah hi kan mamawh leh dawn tho si an ti thung. Kuthnathawktute dinhmun ngaihtuah hian a rilru natthlak takzet a. Tun dinhmunah chuan he harsatna hi sutkian a huphurhawm hle.
Engatinge hetiang hi a thlen tak mai tih chanchinbu mite pawhin an ngaihven nasa a. A bul takah chuan kuthnathawktute hian kaihhruaina an mamawh a ni. Sumdawnnaah hian engtikahmah khawchhak hi kan dang ping thei lova, kan thei mai bawk lovang. Keini lam hian ngaihtuahna hmanga thlai chin kan inzirtir a pawimawhzia a lang chiang a. Thlai chin hlawhtlin ringawt ni lovin market thlenga kan department ten an ngaihtuah chian a ngai a. Tun ang huna thar thei chuan thalchar vanglai ber lai pawhin an thar thei tih a chiang a. A hun hi an hriat a ngai a. Chumi atan chuan kuthnathawktute kuta dah mai lovin kan deptt lam mithiamte pawhin an kaihhruai a ngai.
Kuthnathawltute kaihruai tura din Horticulture leh Aigriculture hian hei hi an ngaihpawimawh a ngai takzet. Hnathawktute kaihhruai hi an mawhphurhna a ni. Dawnfawh chang ni lovin thlai dang zawng zawngah pawh tuna Lamzawl khaw tawrhna hria in a deptt officers leh a hotu ber minister-te hian hma la se. Kuthnathawktute beidawnna hi an mawhphurhnaah ngai hmak sela. Tihsual awm tawh lovin hlawhtlinna mualah hruai lut rawh se.