Kum 2018 French Open champion Simona Halep leh hmeichhe inelna lama seeded number 8 hauhtu Karolina Pliskova te an chesual teuh a. Thawhlehni zanah an khingpuite lakah chak hramin awlsam lo takin second round an lut.
World number one hlui Halep-i’n German mi Nastasja Schunk lakah set hnihna chiang takin a hloh a, mahse insiamtha theiin 6-4 1-6 6-1 in a chak.
Vawi hnih Grand Slam champion ni tawh Halep hian set hmasa ber la turin dawhtheihna leh rilru fim a pu a, set hnihnaah erawh a khingpui kum 18 mi lakah a talbuai nasa hle.
Set thumnaah erawh Halep-i’n a service tha a lantir a, Schunk tan hnehna chan theih a ni lo.
Czech star Pliskova in set khatna hlohin break point a hmachhawn hman bawk a, mahse tualchhung mi wildcard Tessah Andrianjafitrimo chu 2-6 6-3 6-1 in a hneh.
Anni pahnih bakah Paula Badosa leh Aryna Sabalenka ten hnehna an chang ve ve bawk.
Seeded number 3 Badosa hian in midangin harsatna an tawh laiin hnehna chang turin minute 54 bak a mamawh lova, Fiona Ferro 6-2 6-0 in a hneh.
Tun thla a Rome leh Madrid a inelnaah beisei angin che tha lo mahse kum 24 mi in harsatna lian a tawk lova. Inrintawkna siam tur hnehna a nih thu a sawi.
World number 4 ni lai hian world number 68 Kaja Juvan a hmachhawn leh ang.
Seeded number 7 hauhtu Sabalenka pawh midangte ang bawkin awlsam takin a chak thei bik lova. Set hmasa ber a hloh hnuah Chloe Paquet 2-6 6-3 6-4 a hneh turin a tho leh thei.