Aizawl: Delhi-a cham mek, BJP Mizoram State President Vanlalhmuaka chuan union minister pathumte hmun hrang theuhah kawmin, Mizoram mamawh hrang hrang a sawipui theuh.
Vanlalhmuaka hian DoNER Minister G Kishan Reddy chu a pisa a kawm a. Mizoramin infrastructure development a mamawhzia leh thalaiten skill development an mamawhzia sawipuiin, DoNER kaltlanga Mizoram chhunga hmalaknate sorkar laipui atanga tha tak vil ngun turin a chah.
DoNER minister a hmuh zawh hian Union Minister of Railways Ashwini Vaishnaw chu a pisa-ah kawm lehin kum 2024 kum bula Sairang thleng rel kaltir hman ngei tur leh rel kawng siamna turin an ram lak zangnadawmna pek kim loh awmte chu a rang lama chin felsak a ngen a. Vaishnaw pawhin 2024 kum bulah Sairang rel station chu hawn hman ngei a nih tur thu lo hrilhin, zangnadawmna pek ngaite chu lo chin fel thuai a nih tur thu a lo hrilh a ni.
Hemi hnu hian Dr. Rajkumar Ranjan Singh, Union MoS for External Affairs & Education chu a chenna inah hmuin Mizorama JNV School sak mek chungchang te, Kendriya Vidhiyalaya School chungchang te, Mizorama education tihhmasawnna turte bakah Burma ram buaina avanga Zohnahthlak unau Mizorama raltlante leh Delhi hmuna awmte exit permit an neih theih dan tur a sawipui a. Dr Singh hian amah pawh hmarchhak mi a nih avanga ‘common problem’ hi chin fel a nih theih nan theihtawp a chhuah tur thu leh May 27-a Mizoram tlawha a lo theih dawn avangin lawmthu a hrilh nghal bawk.