Aizawl: Kolasib Horticulture department chuan an huam chhung district-a fragon fruit ching tura thlan kuthnathawktu mi 33 hnenah zirtirna an pe.
C. Zosangliana, District Horticulture Officer chuan training hi kaihruaiin nikum leh kum hmasa lamah Covid-19 avanga training mumal taka an neih theih loh avangin kuthnathawktuten duhthusamin an ti tha lo nia an hriat thu a sawi a. Sorkarin cheng nuai tel a senna hi a hlawhchham palh mai a hlauhawm avangin theihtawp chhuah turin kuthnathawktu kalkhawmte a fuih a ni.
Dr. Vanlalremruati Hnamte, ADHO chuan fragon fruit nihphung leh a enkawl dan chungchang zirtirin, India rama dragon fruit ching hmasa ber, Mizoram chu tunah chuan state dangin a lehpel leh der tawh avanga tan lak a ngaihzia a sawi a. Dragon fruit chu hriselna atana thei tha tak, thisen sang, zunthlum leh cancer tan pawha tha a nih thu a sawi bawk.
He hunah hian dragon fruit ban siam dan te, dragon fruit beitu natna hrang hrang leh enkawl dan hrang hrangte mi thiamten an zirtir a ni.
Mission for Integrated Development of Horticulture central scheme hnuaia dragon fruit ching tura thlan, Kolasib district chhunga kuthnathawktu mi 33 hnenah Kolasib Horticulture chuan Centre of Excellence (COE) Training hall, Thingdawlah zirtirna an pe a. Hemi hnu hian Lalnunpuia Project Officer, COE, Thingdawl kaihhruaina hnuaiah COE a dragon fruit chinna hmunte tlawhin a hmunah inzirtirna neih a ni bawk.