World number two Daniil Medvedev leh kum 2021 runner-up Stefanos Tsitsipas ten French Open-ah an khingpui ve ve an hneh a, second round an lut.
Roland Garros a inkhelah US Open champion Medvedev-a’n 6-2 6-2 6-2 in world number 103 Facundo Bagnis a hneh a. Seeded number 4 hauhtu Tsitsipas-a’n set hnih a hloh hmasak hnuah Lorenzo Musetti chu 5-7 4-6 6-2 6-3 6-2 in a bei let.
A awlsam lo
Kum 20 mi Musetti hi nikum fourth round a Novak Djokovic laka set hnih la hmasa zawk tawh a ni a, inhliam avangin world number one lakah a tang tluan zo lo.
Kum 23 mi Greek star lakah pawh hian set hmasa berah inkhel tawk viau mahse set a lak hnuah set hnihnaah 4-0 in hma a hruai nghal a, a khingpui a talbuai hman hle.
Mahse set thumnaah Tsitsipas a insiamtha a, hneh taka set la in a tawp thlengin world number 66 aia a tawnhriat neih that a tilang tluan thei.
“Set hmasa pahnihah ka tan thil a awlsam lo tak zet. A tawpah erawh result lawmawm a ni a, ka kheltha thawkhat viau. Lorenzo khan insiamthatna hun a tir set hnihnaah khan min siamsak miah lova, kha vang khan ka inkhel a dik hleithei thin lo.” tiin Tsitsipas chuan a thlirlet.
Kum 26 mi Medvedev-a’n kumin April tla khan zai a tawh avangin kuminah Roland Garros a khel dawn em tih a hriat loh hman a. Mahse a inkhel hmasa berawh erawh kum 32 Bagnis lakah vanneihna a lamah a tang.
Court Suzanne Lenglen a inkhelah Bagnis-a’n Medvedev-a service break sak hma mahse tun tournament a seeded number two lakah a chetthat a chhunzawm reng thei lova.
Russian mi Bagnis hi chawn hliam in a tihbuai avangin court chhungah a duh angin a che thei lo leh thin a. Darkar khat leh minute 38 chhungin a tlawm.
Medvedev chuan, “Roland Garros a inkhelh hi nuam ka ti a, kuminah nikum aia thui thlen theih ka inbeisei. April a zai ka nih khan clay court season ka khelh theih ka ring lova, mahse ka doctor leh physio te nen kan inrawn a, tunah 100% ka ni leh tawh.” a ti.
Inkhel dang
Kum 2021 Wimbledon semi-finalist Denis Shapovalov chu rin loh takin a tlawm a. Kum 19 mi Holger Rune lakah straight set in a tlawm.
Kum 23 mi seeded number 14 hi kumin Australian Open quarter-final lut tawh niin 2019 junior Roland Garros champion lakah erawh tihsual vanga point chawi vawi 53 ngawt neiin 6-3 6-1 7-6 (7-4) in a tlawm.