- F. VANLALPEKA; IMCS, Aizawl
Mizorama Mau (Bamboo) awm sa zozai te hi chi hrang (30 species of Bamboo) tam tak an ni a, heng zinga tam ber chu Mautak (M.Bacciffera) a ni nghe nghe. Mizoramin Mau a neih tam vang hian sawi a hlawh chho zel a, a bik takin, kan mithiam zawk te leh kan Politician-ho thil sawi ngun pawl tak a ni chho mek. Heti taka Mau kan aupui chhan ber chu, heti zozai Mau awm sa nei state ni si hian, “kan va hmang tangkai tehchiam si lo ve” tih thu leh, “heti zozai Mau kan nei chung si a, hmun dang atanga chaw lut a, kan ching a, kan phun(bamboo plantation) kan buaipui hi” helh fe fe kan awm tak vang a ni ber e.
Hetih mek lai hian, Mizoramin Mau a ngah zia thu ringawt sawi sawi ve lo ten, a thling-baw-hawk khawpa an buaipui mek leh a taka luhchilh a, hrechiangtu te hmuh dan erawh a dang daih thung ! Mizoram hian Mau chu a ngahin, a nei tam ngei mai, nimahsela, vawiin niah hian “ khawi hmunah chuan nge Mau tam tak chu an awm ?” tih tak mai hian thil thui tak a hril ta !
Mizoram chhunga Mau kan ngah thu ringawt hian eng kawng mah min thlen lova,”thu chauh, hla chauh” a ni ringawt. Hei vang hian, Mau awm sa kan ngah thu aupui a, social media lama puanzar lam ngawt tuipui aiin, kan tangkaipui theihna tur ngaihtuahtu te thil tih lo Amen-pui mai hi a hahdamin, a dik a, a fing ber bawk.
A nih loh leh, Mizoram Mau neih mek te chu hmang tangkai tur leh dinchhuahpui tur khawpa Mau tamna hmun chu han pan chat teh le ?
Aizawl atanga chhim leh hmar, chhak leh thlang hrut kualin, han fang vel teh khai. A rang thei ang bera i sawi (report) tur chu……. “ Mizoramin Mau kan neih mekna hmun hi hlawkna hmu tur khawpa Lirthei lian chi hmanga phurhchhuah theihna tur khawiah mah a lo awm reng reng hlei nem” i ti ngei ang. Mimal ram chhunga Mau tlem den den leh thingtlang khaw thenkhat Mauhak hmuna an Mau neih mek te chu ruk sak ngawt dawn pawhin, “chhungkaw intunnunna khawp a awm reng reng lo” i ti zui ngei bawk ang.
Mizo mipui sum hnar lian tham nei tur khawpa Mau awm sa ring tur hian, an awmna hmun atanga phurchhuak turin, tha leh senso tur a inmil hlawl lo. Khawvel mithiam rual ten “Mau hmanga ram intodelh theih” an tih dan leh Mizoramin vawiin nia Mau awm sa a neih mek awmna hmun hian awmzia a nei lo. Chuvangin, Mau awm sa kan tih, Mau lian tha pawh ni si lo, hmun hla taka mi umzui a, buai buai lo hian, lamhnai zawka Mau tha ber chi dah luh dan dap mai hi a hun ta.
A nih loh leh, Mizoram Leilung, ram awl hei huai hmunah hian, buai takin ram pilril zawka awm te hi lamhnai takah phunsawn emaw, siksawi ngawt theih a ni dawn chuang em ni ? Lo theih teh reng mahse, a hranpa a buaipui tur pawhin, kan Mau neih tam ber Mautak ( Melocanna Baccifera) lah hi a pum a te lutuk a, tharthawh tak tak tur leh Industry behchhan tak tak tur pawhin, a hralhna (market) tinzawnin, a la inmil chuang lo.
India ram chhung mai ni lo, khawvel hmun hla zawkah, Industries behchhan vekin Mau an buaipui tawh. Mizorama Mau awm sa, Mau pum lian ni lo, Mautak,Rawthing, Rawnal etc. ang chi hi chu an buaipui ve lo. Mizoramin tun hma lama kan buaipui “Mizo Vawk” kan vulh thin, Vawk lian ni lo zawng zawng te kha tunah chuan Vawk lian, chi tha zawkin kan thlak vek tawh ang chiah hian, “Mau awm sa” tih ngawta tan kan khawh reng mai hi a hun tawh lo.
Khawvel ram hmasawnna thlir pha chin leh ram intodelh theihna tur hmu pha chin te chuan awmze nei zawka Mau buaipui hi thil fuh ber zinga mi niin an ngai tawh. Mau rau rauvah pawh, Industries Supported Quality (ISQ), Mau lian (Giant Bamboo) leh Mau Hmantlak (Commercial species of Bamboo) chauh an buaipui.
Chuvangin, tuna hmasawnna tura Mizoramin Mau a taka a buaipui tak ber “Dendrocalamus Brandasii” (state pawn lam mau) bakah, Mizoram tualto Mau lian ber Rawmi “Dendrocalamus Sikkimensis” (Mizoram Indigenous Bamboo) te hi “lamhnai zawk leh remchang zawka Mau chinna hmun (Bamboo Plantation) nei tura a kalpui tak te an ni. Khawvelin “Mau tha ber leh Mau lian dik tak” an tih ngei an ni. Mau hlawk tur ngei an ni a, Mau hmanga kawng hrang hranga sum hmuh theihna tura hmalakna kal mek hi lo “helh em em” emaw, mi kawngkal mai mai “lo haw ringawt” ang chi te, vawiin chu tu ber nge “Social Media lama ka sawisel leh ang aw?” ti thin te, mi sawiselna thu “lo tuihnih nghal ngawt ching” mi te ang ni lova, ram tana tha tur tih tlang hriat sa ang hi chu lo Amen theih mai hi mi zahawm an ni.
Mizoram leilung atang hian dehchhuah/tharchhuah tam theih chi leh suma chantir theih kawng dap vat hi kan tih tur hmasa ber leh kan makmawh hmasa ber a ni. Tharchhuak tam thei tura thil chiang em em chu Mau atanga a tuai ei tur Rawtuai (Bamboo Shoot) hmathlir neih hi a fuh hle a. A chhan chu, tuna sawrkar hmalakna atanga Mau lian phun tawh atanga a tuai lo awm tur ringawt pawh hi Company (IMCS ?) pakhat tan pawha innghahna tham (raw-material neihna tham) a tling mai dawn ! Chutiang bawkin, Kolasib District chhung bikah ringawt pawh, tuna Mau lian chingtute hnena mi zawng hi Bamboo Ply siamtu (Nutech Bamboo Project Pvt.Ltd.?) ten hna an tan theihna (raw-materials tling pha) a ni dawm bawk. Chutiang zelin, tuna Bamboo Agarbati Sticks siam mektu (MBDA & Society Firms ?) te tan, tuna Mizoram Mau lian chingtute tharchhuah mai tur hi Mau dang ho aia a hlawk zawk dawn avangin,(raw-materials atana) innghahna tlak a ni dawn bawk. Heng baklah, tuna Mizoram Mau lian chin mek te hi Mau Meihawl (Bamboo Charcoal Industry) buaipuitu tur (IMCS ?) ten nghakhlel takin an thlir reng bawk.
Mizoramin Mau lian chi kan tharchhuah tawh dawn avangin, tun atanga Bamboo Furniture Industry siam tum ten a china hmun zeal Mau hmantlak hmasa a piang an khawnkhawm tawh dawn bawk a. Wood hmanga Furniture siam te aia a tlawm zawk beiseiin, tun atang pawhin zawhna a awm nghal .