- Mahmuaka Chhakchhuak
Sept. 11, 2001 zinglam dar 8:46:30 ah chiah mai chuan mi firfiakte hruaikawi khualzin phur thlawhna pali zinga pahnih chuan World Trade Center chu panding vang vangin Thlawhna lian pakhat zawk American Airlines Flight 11 (Boeing 767-200) chuan WTC ding thianga hmar lam a mi zawk chu a rawn su ta bur mai a. Chu In chhawng sang tak chu a alh nghal zuai zuaiin chumi hnu reilote, dar 9:02:59 ah chiah mai chuan WTC chhim lam zawk inchhawng sang chu thlawhna dang United Airlines Flight 175 (Boeing 767-200) chuan a rawn su leh ta bur mai a, thelh mih rual lohin kangmei nasa tak a chhuak nghalin a chhunga mihring tam tak awmte chu mangang thlabarin an awm a, a thente chu tukverh sang tak tak atangtein an zuangthla hial a. Chhim lam inchhawng sang (South Tower) chu minute 56 a kan hnuah a chelh ding zo turin a ruhrel chuan chakna a neih tak loh avangin a chim ta rum rum a. North Tower ngei pawh chu Thlawhnain a sut atanga minute 102 hnuah chuan a chim ve leh ta bawk a. Hetih lai vek hian firfiakhoin an thunun khualzin phur thlawhna lian dang pakhat chu Pensylvania chhimthlang lamah a tla a, pakhat leh pawh chuan US sipai hmunpui Pentagon a su bawk a ni.
He thilthleng hian minute reiloteah khawvel pum dap chhuak nghalin mi 2,974 zet an thiin thlawhna hruaikawitu mi 19 te chuan an nunna hlu tak an chan bawk a. Thlawhnaa chuang mi 246 zingah dmchhuak pakhatmah awm loin an nunna an chan vek a, WTC chhunga awmte leh chhanchhuaktu pawl leh police tam takte chuan an nunna an chan bawk a ni. Hemi zanah hian US President George W. Bush chuan ram mipuite hnenah thuchah a sawi a, he a thuchah sawi hi Michael Gerson ziah a ni nghe nghe. Zan dar 8;30 Pm ah thuchah hi sawi tanin – Chibai ule, vawiinah khan kan khua leh tui duhawm tak takte; rawlrala chet chinghoin nunphung pangngaia mipui awm leh kan zalennate chu diriam taka a zawna rawn beiin nunna hlu tak, thahnem tak chu kan chan ta tia thusawi bul tanin firfiakte hian hetiang hmang hian min rawn tihthaih a min rawn vau beh tumna hmanrua atan hmang mahsela kan ram hi a chak tawk a, hetianga vaubeh leh vau zam mai mai chi kan ni lo.
Rawlrala chete hian kan building lian tak tak chu an rawn su chhe thei pawh a ni ang a, nimahsela American lungphung nghet tak chu an khawih che phak lo hrim hrim. America ram hi khawvela zalenna meichher chhitu ropui ber a nih avang hian an bitum bik ni pawhin a lang a, chu meichher eng mawi tak chu tumah hian an timit dawn lo reng reng a ni. Khatia beihna kan han tawh thutah khan kan Emergency-a thawktuten ruahmanna an nei nghal a, kan sipaite an inpeih nghal at bawk a ni. Heng mai bakah hian kan pawisa lam dinhmun pawh a nghet tawk bawk a, kan ram hmasawnna tura business chu a kal pangngaiin a kal leh thei nghal dawn bawk a, harsatna engmah kan nei lo ang. Heng thila a mawhphurtute zawnchhuah hna chu tan nghal a ni bawk a, kan sorkar hian a theihna zawng zawng hmangin heng thil titute hi an phutawkin an chungah kut a thlak ve dawn a ni. An thiltih avang hian America sorkar chuan a thungrul ngei ang. Sam 23;4 thuah chuan ‘thihna hlim kawr ruam zawh mah ila, thil tha lo reng reng ka hlau lo ang; nang ka hnenah i awm si a; I talhtum leh i tiangin min thlamuan thin a ni’ tih angin Pathian hnenah kan tawngtai bawk ang a, hna min thawhsak bawk ang tih hi ka ring nghet tlat a ni tiin thuchah ropui tak a sawi a.
He ni pawimawh tak mai Sept 11 hi America mipuite chuan kumtin urhsun takin an la hmang zel a, ram hruaitu leh ram mipui zawng zawngte thinlungah hnam hmangaihna an tuh thar leh thin a ni. Indopui pahnihnaa Japan rama Atom Bomb thlak ni – August 6 chu Japan mipuite chuan ‘World Peace Day’ tiin a uar thei ang berin an serh a. Baloon lian pui puiin ‘Remna Thuchah’, ‘Muanna Thuchah’ tiin khawvel hmun tam takah an thlak thin. YMCA pawhin khawvel pum muanna ni (World Peace Day) hi remna leh muanna a awm zel theihna atan a serhin tawngtaina hunte nen a hmang thin bawk. Japan ramah chuan Atom Bomb thlak laia la damte chawimawina hunte hmangin bomb thlak vanga nunna chante chu ‘Martar’ an ti a, an thlanah pangpar an dah ziah thin bawkin ram mipuite ngei pawhin hnam hmangaihna an neih thar theihna atan urhsun takin he ni hi an hmang thin a ni. Chu mai bakah chuan Atom Bomb thlaktu US sorkar ngei pawh chu thupha chawi tir thei khawpin an tangrual a thain ke an pen chak a, dinhmun chau takin lo awm tawh mahsela Japan chuan sipai chakna niloin Electronic chakna hmangin tunah chuan khawvel chu an lo hneh leh ta a nih hi.
Tawrhna atangin inpumkhatna an lo neih lehzual phah a, tawrhna avang vek chuan ram leh hnam hmangaihna thinlung an lo neih phah bawk a ni. Hei hi keini ngei pawhin kan mamawh tak a ni ang a, kan ramin kum 1966-a ram pum huapa tawrhna kan neihte leh kan unau tam takin an nunna hlu tak an lo chan phah tawhna kha thangtharte ngei pawhin hnam hmangaihna thinlung kan neih theihna tur atana hmanraw pawimawh taka kan hman chhoh zel a pawimawh. Vai huat kan inzirtir a, kan kianga hnam dangte laka kuttum lek chakna kan neih thar leh ngawt kha thil tha ber pawh a ni lo ang a, tul pawh a tul kher lo ang. Chu ai chuan hnam dangte chunga kan awm theihna tura zirna kawngahte tan kan lak phahna turin leh ei leh bar kawnga intodelh thei tura thinlung khauh tak kan neihna tur ni zawk sela a duhawm hle zawk a ni. Chutiang bawkin July 26 ni ngei pawh hi tun thangthar huna Assam nena ramri hnaiha inkahna ni ti ringawt lo a mizo mipuite hian ram leh hnam hmangaihna thinlung kan neih thar leh theihna tur zawka kan hriatreng hi kan hlawkpui zawk ngeiin a rinawm.
July 26, 2021-ah khan chunglam puihna vangin nunna chan kan awm lo a, Assam lam erawh chuan mi 6 laiin an nunna hlu tak an chan thung. Assam lam atanga Puanvar an rawn vai avangin kha inkahna kha tihtawp a nih bawk kha. Khami niah khan zoram mipui zawng zawngin mahni awmhmunah theuh lawmna avangin kut kan beng a, ram hruaitu zawng zawngte nen thinlung hmunkhat puin kan awm a nih kha. He ni pawimawh tak mai July 26 ni hi kan ngaih pawimawh a tul hle mai a, hnam hmangaihna thinlung kan neih phah theihna tura thangtharte thinlunga thu kan sawi uar lehzual pawh a pawimawh hle bawk ang. Mizo tawh phawtte chuan he July 26 ni hi i theihnghilh hauh lo ila i hre reng fo ang u. He ni hruikhat vuana mizote kan awmna ni leh lungrual taka hmelma kan beihletna ni a ni si a.