AIZAWL: Ni 5 awh tur Accredited Social Health Activist (ASHA) refreshers training chu nimin khan Siaha district-a ASHA te pualin I&PRO Conference hall, Siaha-ah tan a ni.
State Nodal Officer Dr. R. Lalchhuanawma’n Refresher training buatsaih a nih chhan te sawiin, rilru pe tak leh thahnemngai taka training tur leh an training atanga thiamna leh hriatna thar pawchhuak ngei turin trainees te a chah.
CMO, Siaha Dr. Lalnunziri’n trainees te fuihna thu sawiin, nu leh naupang thihna tihtlem chu National Health Mission (NHM) thil tum a nih thu a sawi a. Hemi kawnga hmalaknaah ASHA te chu thawktu pawimawh ber pakhat an ni tih hre reng tura chahin, tun aia nasaa tan la leh zual turin a ngen.
ASHA ten tha zawk leh hriam zawka hna an thawh theihna tura training chu buatsaih a nih thu CMO chuan sawiin, an hlawkpui ngei a beisei thu a sawi a, duhsakna a hlan bawk.
Siaha district-a ASHA te hi State trainer Selina Vanlaltluangi, District trainer pahnih – Mary Vanlalpeki leh Mazzie Hlychho ten zirtirna an pe a. Siaha district-ah hian ASHA 77 an awm mek a ni.