India-a SpiceJet airline chuan Thawhlehni khan an computer khawlpui (system) chu ‘ransomware-a beih tum’ a nih thu leh hei vang hian an thlawhna thlawk chhuak tur tam tak tihkhawtlai a ni a, tumhmunah a chuang tur tam tam tak an tangkhan phah.
Nilaini thleng pawh khan thlawhna thlawk tur tam tak tihkhawtlai a ni a, passenger-te chuan anmahni an dawnsawn danah sawisel an ngah phah hle.
Twitter-a thlalak leh video tar chhuahahte chuan thlawhnaa an luh hnuah darkar eng emaw zat an thu a, an thlawh chhuah mai loh chhan lah airline atanga hriat tur a awm loh thu an tar lang hlawm.
A hnuah SpiceJet chuan an buaina chu an ching fel tawh tih an sawi.
“Kan IT team-in tifelin buaina awm chu a tawp tawh a, dan pangngaiin tun atang chuan thlawhna a thlawk leh tawh,” tiin Twitter-ah an tar lang.
Airline-in an thlawk leh thei tawh tih an tar lan hi passenger tam takin social media-ah chhangin tumhmun eng emaw zatah an la tan hlawm thu an sawi a, ei leh in tur awm miah lovin darkar tam tak an nghak tih an sawi a, thawktute biakpawh hleihtheih an ni bawk si lo niin an sawi hlawm.
Passenger pakhat, Mudit Shejwar chuan Dharamsala pana a thlawk tur chu darkar thum chuang tihkhawtlai a ni tih a tar lang a. “Thlawhnaa kan luh hnuah minute 80 a kal tawh a, kan la thlawk chhuak lo,” a ti.
Mi dangte pawhin an dinhmun sawi chiang tura tiin thawktute an bo vek niin an tar lang a. An thlawk leh thei an tih hnuah thawktute an la che eih lo niin an sawi bawk.
“Naupang leh kum upa kan nei a, tui leh ei tur awm miah lovin kan awm a. Gate-ah tumah an awm lo va, chanchin engmah sawi a awm bawk si lo,” tiin passenger pakhat pawhin a tar lang a. Complain-tu dangte pawhin customer service helpline number-te biakpawh theih an ni lo niin an tar lang bawk.