Team intluk tawk tak pahnih zinga chak tura rinhlawh lo zawkin inkhel entu mipui leh an khingpuite an barakhaih a. Champion tura rinhlawh Hunthar Veng chu Thutak Nunpuitu Team in an hneh.
Thawhlehni zan a R Dengṭhuama Indoor Stadium a Zothan Autoworks Pro Volleyball League 2022 semi-final inkhelah 25-20, 20-25, 11-25, 25-19, 15-13 (3-2) in TNT in an khingpuite an hneh a, 2016 hnua a vawi khatna leh a tum hnih nan Pro Volleyball final an lut.
Mizo hlanga khel Muanna Veng team tan Valbuanga bawk a pawimawh leh a, Vanlaltanchhana hian point 25 hmuin 10 hloh. Chak tur chinfelna set nganaah 13-13 a nihlaiin point hlu tak a thawkchhuak a, F Lalhriatpuia’n net bulah Hunthar spiker Laldensanga vuak dang thlain hnehna hlu tak an chang.
Ni nga kal ta khan Hunthar nen league-ah insuin set khat mah la lovin chiang em em in TNT an tlawm a, championship kal meka vawi nga an khelhah an chak vawi hnihna chauh ni mahse trophy an chuh dawn a, semifinal hnuhnung zawka inkhel tur Tuichangral leh Durtlang North nen Zirtawpni zanah final an khel ang.
A hun takah TNT
League-a sang ber ni chunga semifinal khel Huntharin bul an tan fuh lo va, TNT-in net bulah tha takin Gagan Kumar-a ball vuak an dang a, harsatna an tawk. Set hloh lova khelh thum an chak zawn hnua set an hloh hmasak ber thleng mahse insiam thain set hnih an thunun zawn a, Densanga, Lalramnunfela leh Zomuansanga bakah Gagan-a’n awmzia a nei thar ve leh a, hneh takin set thumna an awpbet.
Set lina atangin Lalrinzuala Hnamte chuan TNT fuih phurin kawng dikah an kir leh a, Huntharin vuak thlak harsat thar lehin an talbuai a, an insiam thar zui mai thei lo. TNT-in an tan hmun sawhnghetin Valbuanga’n langsar taka a khelh bakah hun pawimawhah captain Vanlalchhantluanga Sailo leh Zosangzuala an rin tlak tel a, championship kal meka hneh theih loh ang maia chungnung hman Hunthar hneh hmasa ber an ni a, an mamawh fiahna hautak pal tlangin rahbi pawimawh tak an tuk.
Vawi khat aia tam champion thei awm chhun Huntharin engti zawng pawhin rin an hlawh zawk na a, a tum thum nan champion an tumna a hlawhchham. Densanga’n point 21 hmuin vawi li a tisual a, D3 Business Player of the Night lawmman dawng mahse team tan a hlu zo lo.
Championship kal meka an khelh tum nganaah a vawi khat nan an tlawm a, Pro Volleyball hnuhnung ber 2019 ang bawkin semifinal pal tlang zo lovin an tla a. Tun tum Pro Volleyball-ah la champion ngai lo an champion dawn tih a chiang.