Manchester City captain hlui Vincent Kompany chu English club Burnley enkawl tura biak a ni mek a, Anderlecht manager nihna a chhuahsan hnuah England-ah a kir dawn niin a lang mek.
Kum 36 mi Kompany hian an ram club hi tun season-ah league-ah pathumna nihpuiin Belgian Cup final a luhpui a. Club nen an thawhhona titawp turin inremna an neih hnuah Kompany hian a chhuahsan.
Burnley hi Premier League atanga Championship a tla thla tur an ni a, sum lamah harsatna nei neuh neuh bawk nimahsela coach te hip thei tura club tha nia ngaih an la ni a, club lam hian coach hrang hrang an ngaihven hnuah Kompany hi an duh ber nia ngaih a ni.
Clarets hian an sum dinhmun chhawk turin American finance company MSD Holdings atangin Pound maktaduai 65 loan an hmu a, hei hi tunah chuan a tam zawk rulh fel a ni tawh.
Kum 10 chhung an club enkawl tawh Sean Dyche chu April thla khan an ban a, Mike Jackson chuan interim manager angin thlak mahse an tlakna tur a dal thei lo.
Belgium defender hlui hian kum 11 chhung Manchester City-ah hun a hmang a, trophy lian 10 a chawi zingah Premier League title pali a tel.
A nupui Carla chu Manchester khawchhuak a ni a, hei vang hian England hmar thlang lama insawn chu an chhungkaw tan pawha thutlukna siam harsa lo tura ngaih a ni bawk.