Boston Celtics in tum an nei a, khelhdan nghet an nei. Defense an khelh that thin chu NBA Playoffs a an ralthuam hlauhawm berah an hmang thin a, hei hi an hlawhtlinpui fo.
Ningani zingah Miami Heat lakah an chakpui leh a, offense nei tha team in Celtics lakah an daih tluan zo lo. 93-80 in Celtics hi an chak a, 3-2 in best of seven series-ah hma an hruai.
Eastern Conference finals-ah chak zawka tang turin Celtics in vawikhat chak chiah an mamawh tawh.
Miami Heat ho court, Florida a FTX Arena-ah Heat in bul an tan tha zawk a, first half-ah point nga in hma an hruai. 2nd half-ah erawh Celtics defense in Heat player-te an hrek a. Jaylen Brown leh Jayson Tatum ten Boston tan point score thin bawkin an intlansan nasa hle.
Brown-a’n point 25 a score a, Tatum-a’n point 22 leh assist vawi 9 a nei. Derrick White leh Al Horford ten point 14 leh 16 an score bawk.
Miami tan Bam Adebayo chuan point 18 leh rebound 10 a la a. Game 4 ang thovin Heat shooting a kal lo hle a. 32% shooting percentage inkhel pumpuiah an nei a, 3 points bikah vawi 45 atang vawi sarih chiah an lut.
Celtics coach Ime Udoka chuan, “Kan defense hmanga team te kan hrekna, taksa bakah an rilru leh inpekna zawnga hah taka kan siam thin rah a lang a, tun playoffs-ah hei hi kan chakpui chang a tam thin.” tiin an inkhel chungchang a sawi.