Aizawl: Mizoram Government Adhoc Aided High School (MIGAHTA)-in vawiin khan Chanmari YMA Hall, Aizawlah General Conference an hmang a, resolution pass-in adoc aided high school zawng zawngte chu provincialise-a hlan kai an duh thu an sawi.
MIGAHTA resolution chuan, “Chief Minister Zoramthanga leh Education minister Lalchhandama Ralte, zirna ngaisang tu leh hmasawnna thlentute hian Adhoc Aided high sikul hi kan zavaiin Mizoram sorkarin a lak (provincialise)-ah min hlang kai rawh se,” an ti a, an inkhawmpui hmanpuitu, education minister hnenah resolution hi an hlan nghal a ni.
He hun hmanpuitu, Education Minister Lalchhandama Ralte chuan MIGAHTA-ten sorkara an thil phut, provincialise-a hlan kai chu sum harsatna avanga tih mai theih loh a nih dan sawifiahin school education huang chhungah ringawt hian Adhoc Aided High School 129, Middle School 67, Higher secondary school 10 vel an awm thu a sawi.
Lump sum school 100 chuang fe adhoc aided-a hlan kai beisei te, private school atanga lump suma hlan kai beisei school 100 chuang an awm bawk a, Samagra Shiksha hnuaiah kum tam tak hlawh ngaia thu hlawh tihsan beisei hnathawk 5,000 bawr an awm tih sawiin, heng zawng zawngte hi ngaihtuah ngai a nih avangin sorkar dinhmun hrethiam turin kalkhawmte a chah.
MIGAHTA Conference-ah hian an member boral sunna hun hmangin, an pawl hmalakna tur hrang hrang an rel a, pawl hruaitu thar an thlang bawk.
MIGAHTA-ah hian High school 129 awmin, member hi 900 bawr vel an awm a ni.