Senagal khawthlang lama Tivaouane khawpuiah damdawi in nasa taka kangin nau piang hlim 11 zet an thi tih an ram president chuan a sawi.
Mame Abdou Aziz Sy Dabakh Hospital-ah hian nau neihna, maternity department-ah kangmei hi a chhuak niin President Macky Sall hian Twitter-ah a tar lang.
Senegalese politician-te chuan tuna hriat theih chinah chuan electric short circuit vanga kangmei hi chhuak niin an sawi hlawm.
Naute pathum chu chhan hman an ni tih Mayor Demba Diop Sy chuan a sawi.
Kangmei hi rang taka inman kai nghalin emergency services chu rang takin thleng mah se an inchhan hman ta lo nual niin Sy-a chuan tual chhung chanchinbute a hrilh.
Damdawi in hi tun hnai lawka hawn niin tual chhung chanchinbute tar lan chu AFP-in a tar lang chhawng veleh.
President Sall chuan, “Naute nute leh an chhungte ka tawrhpui tak zet a ni,” tiin Twitter-ah hian a tar lang.
“A vanduaithlakin a hrehawm tak zet a ni,” tiin Health Minister Abdoulaye Diouf Sarr chuan World Health Organization meeting-a Geneva-a a telna atangin a sawi.
Kangmei chhuah chhan hi chhui nghal a nih thu leh a zin hun chhung tur pawh pawt tawiin Senegal-ah a kir leh nghal thuai dawn thu a sawi bawk.
Damdawi ina kangmei chhuak chungchangah hian social media-ah titi a tamin an rama damdawi in enkawl dan leh him loh dan an sawi nasa hle.
Eptu MP Mamadou Lamine Diallo chuan sorkar sawiselin, “Sorkar damdawi inah naute tam tak an kang hlum… hetiang hi thil thleng atana pawm harsa a ni,” tiin Twitter-ah a tar lang.
Rights group Amnesty International pawhin sorkar hnenah a chhuitu tur dina a mawhphurtu hre tur leh hrem turin an ngen a, eng ang dinhmun luahtu pawh ni se hrem lohva chhuah lo turin an ngen tih an rama director, Seydi Gassama chuan Twitter-ah a tar lang.
Amnesty hian nikuma hmar lam, Linguère khuaa tuna mi ang deuh chhiatna a thlen hnuah khan Senegal ram chhunga nausente dahna pindan (neo-natal ward) zawng zawng chu a thlen nawn tawh loh nana endik vek turin sorkar a lo ngen tawh bawk.
Nikum khan maternity ward-ah tho kangmei a chhuah avangin nau piang hlim pali an thi a. Hemi tum hian mayor chuan ward chhunga boruak vawnna (air conditioning unit)-a electric kal sual vanga chhuak niin a sawi.