Union Minister of State for Railways & Textiles Darshana Jardosh chuan textiles ministry-in Mizorama silk industry tihhmasawn nan state sorkarah Rs nuai 700 chuang pe turin ruahmanna a siam thu a sawi.
Mizorama cham mek, Jardosh chuan nimin khan Chawilung khua a tlawh a, a puala vantlang inkhawm an lo buatsaihah silk industry tihhmasawn nan Mizoram sorkarah Rs nuai 700 chuang pe tura ruahmanna an siam thu hi a puang.
Chawilung khua chu sericulture model village-a puan a nih theih nan hmalak a tum thu sawiin, India-in intodelhna scheme a kalpui mek chu Chawilung khuain an chhim phak tur thu leh mi tin hamthatna thlen chu sorkar laipui thil tum a nih thu a sawi.
Union minister chuan India sorkarin hmeichhiate dinhmun tihhmasawn nan nasa taka tan lak a tum thu sawiin puanthan lama hmasawn nan hmeichhiaten mawhphurhna pawimawh tak an nei tih an hriat a tul tih a sawi bakah hmeichhiate hi chhungkaw enkawltu an nih theih bakah eizawngtu an ni thei tih a sawi bawk.
Chawilung khawtlang hruaitute chuan Jardosh-i hnenah hian an khawtlang mamawh hrang hrang an lo thlen a, Hmuifang leh Baktawng inkar kawng, National Highway-a puan te, class 10 thleng zirna an neih theih nana hma lakpui tur te, Sericulture Link Road, Solar pump leh Solar light te an neih theih nana pui tur leh health sub centre an neih theih nana hma lakpui tur tein an lo ngen a ni.
Jardosh-i chuan thingtheihmu chinna hmun leh pangang Eri khawina hmun turte a tlawh bawk a. Chawilungah hian thingtheihmu ching leh eri khawitu intelkhawm chhungkaw 25 an awm a ni.