A TIRIN HETI HI A NI A
Kum nga liam ta May 10, 2017 khan Justin Bieber-a’n ‘Purpose’ tour kal zelah DY Patil Stadium, Mumbai-ah India rama show a neih hmasak ber ni turin a inlan.
Ticket manto uchuak tak nia sawiah hian mi 40,000 chuang an kalkhawm a, mahse an lawm a kim lo mai ni lovin, thinrim angreng takin show zawh hnu ah In lam panin an haw.
JB hi stage-ah mit la thei ang berin a inlan a, hmeichhe tleirawlte’ atchilh a nihna a takin a pholang. Mahse, a rei lo. Media hrang hrang tarlan danin, zai tak tak lovin hmun phun satliah (lip-synching) in a che vel mai mai tih ah hmuchhuak.
Concert laklawh lai leh zawh hnu lamah social media platform hrang hrangah lungawi lohna leh thinrimna a ri chuah chuah. Ticket manto tak taka lei te an thinrim a, hmun phun satliahah pawh phun tha peih lo ang hiala chhuah a ni.
Tunah JB hian New Delhi a pan dawn.. Jawaharlal Nehru Stadium-ah ticket man Rs 4,000 atanga in tan in,m show a rawn nei dawn. Mumbai-a thil thleng a taka hmu a, hrechiang te tan rilru a phir ngei dawn bawk.
Fan te chuan tun tum chu a zai tak tak an ringin, beiseina sang tak an nei. JB hian a tihsual nawn tawh lo hram an ring.
Tarlan tawh angin October 18 hian Jawaharlal Nehru Stadium-ah Indian fan te a awi dawn a, New Delhi khawpui tan zan chhinchhiahtlak a ni dawn tih a chiang.
India-in hripui a hmachhawn hnu lama milar concert a thlen vawikhatna turah hian inbuatsaihna pawh chak taka kalpui a ni.
Mexico atangin Justin Bieber a inlan dawn a, Italy-ah a chawlh zawk hnu ah August hian Scandinavia ram te a hrut ang. Hemi hnu hian South America, South Africa leh Middle East te a tuam chhunzawm ang a, India-in a lo mikhual ang.
Kumin tawp kharna tur atan Asia, Australia leh New Zealand-ah a inlan hnu ah 2023 tir lam hian UK leh Europe a nuai dawn a ni.