Aston Villa in defender thar an nei dawn a, Spanish club Sevilla atangin Brazil centre-back Diego Carlos chu Pound maktaduai 26 a lalut turin inremna an nei.
Kum 29 mi hi January thla khan Newcastle United in lakluh tumin an bei a, mahse an hlawhtling zo lo. Ningani zan khan medical bakah a contract ti fel turin England a pan.
Nikum Tokyo Olympics khan Carlos hi Brazil in an rinrawl niin gold medal an lakna kawngah match ruk a khel.
Aston Villa manager Steven Gerrard chuan an central defender Ezri Konsa chu a inhliam avangin season chawhma lamah a inkhel nghal thuai thei dawn lo tih a lo sawi tawh a. Midlands club hian an tlarhnung phui lo leh thin chu tihchak an duh bawk.
Sevilla tlarhnung khaikhawm thintu hian kum 2015 khan an ram chhuahsan in Portugal a pan a. Estoril tan khelin a kum lehah Ligue 1-ah Nantes a zawm a, season thum a khelh hnuah Sevilla in an lalut a. Season thum chhungin an player pawimawh a ni.
Aston Villa chuan, “Sevilla FC nen Diego Carlos-a insawnna turin inremna kan nei tawh a, England-ah medical nei turin a kal thuai ang.” tiin an sawi.
Tun nipuiah Villa in player thar an lakluh pahnihna a ni dawn a, French defensive midfielder Boubacar Kamara chu an lalut tawh.