Aizawl: School Education Minister Lalchhandama Ralte chuan nimin khan St Pauls’ HSS zirlai hruaitu lak luhna hun School Auditorium-a buatsaih khuallian niin a hman pui.
He hunah thu sawiin Lalchhandama Ralte chuan St Pauls HSS-a house caption leh vice captain thlan tharte chu zirna leh mi mal nunah hmasawnna ropui tak a ni tih sawiin, zirlai hlawhtling leh hriat hlawh ni zui thei tura a fuih bakah, house captain te chu tum ruhna leh mahni inrintawkna nen an mawhphurhna hlen turin leh, an zirlai puite fuih phur a, ram tana mi pawimawh ni thei turin a fuih a, a tha ber ni tura an beihnaah zuai lo a theihtawp chhuah reng turin a chah bawk.
Minister hian house captain atana ruatna a sawi bakah an badge leh house flag te a hlan a. He hunah hian zirlaiten zai leh lâm te, martial arts dance te leh entertainment dance te an entir a ni.
St Pauls Higher Secondary School Investiture-ah hian principal leh thawktute, he school-a lut zirlaite, zirlai nu leh pa thenkhatte leh Tlangnuam khawtlang hruaitute an tel.
St Pauls HSS-ah hian principal leh teaching staff 55 an awm a, class IX-XII thleng zirlai 1,289 an awm mek a, class XI chu admission tih lai a ni a, an la lut ve rih lo a ni.