Hollywood movie lar, ‘The Fast and the Furious’-a thil thleng ang deuh khan mi pathum chuan tun lai thiamna changkang tak tak hmangin car changkang 40 chuang zet an ru niin an man hnuah Zirtawpni khan police-in an sawi.
Car ruk nan hian scanner leh GPS jammer te pawh an hmang niin an sawi.
An mi mante hi Delhi khawpuia Uttam Nagar-a cheng, Manish Rao (42) leh Jagdeep Sharma (43) leh Uttar Pradesh-a Meerut mi, Aas Mohammad (40) an nih thu an sawi.
Rao leh Sharma hi car ruk nen man an ni a. An car ruk hi Paschim Vihar-ah hmuh a ni tih Deputy Commissioner of Police (southwest) Manoj C chuan a sawi.
An car ruk an dapah hmanrua an hman zinga sensor kit, magnet, LNT chabi leh remote car chabi pariatte an hmu chhuak.
Mohammad-a hi heng car rukte thawn darhtu ber a ni a, ani pawh man a nih thu police chuan sawiin Rajasthan-ah a hralh thin niin an sawi.
Hollywood movie ‘The Fast & the Furious’-a an tih dan atanga che chhuak an ni a, scanner hmangin minute reilo te chhungin car in-lock an phelh thei a, GPS an lo vuah a nih pawhin jammer hmangin hna a thawh theih loh nan an ti thin niin DCP chuan a sawi.
An pathum hian hriat hlawh lem lo, ‘Ravi Uttam Nagar gang’ mi leh sa an ni tih police chuan an sawi bawk.
An pathum hian an hotupa, Ravi-a tan April thla atang khan car 40 chuang an ru tawh tih an sawi a. Delhi-a Uttam Nagar, Tilak Nagar, Subash Nagar, Pashim Vihar, Munirka, Dwarka vela mi an ru ber a, Rajasthan leh Meerut-ah an hralh deuh ber niin DCP chuan a sawi.
“An pathum hian software hmanga duan hacking device an nei a, car in-lock chu hawngin lirtheia software chu an tiruak vek a, software thar chu an device hmangin an thun leh a. Chabi pawh peih sa niin minute hnih thum chhung lekin an ru fel hman zel,” tiin DCP chuan a sawi.
Car an ruk hnuah mi tamna hmun deuh ni si, mi en uluk lohna tur ang chi, damdawi in bul velah an hung a, CCTV camera awm lohna an thlang thin bawk tih a sawi.
An lirthei ruk sa chu a leituten an phut chuan an kutah an thlen thlap thin bawk.
Pistol pahnih leh a mu panga, tool kit, hacking device, car chabi 30, lirthei hmanrua leh car an ruk sa pasarih an mansak tel a ni.