Japan chuan a sipai hmanraw tha bikte chu ram dangah a thawn chhuak dawn a, a leitu tur zingah India pawh a tel a. A leitir tur zingah hian missile leh indo thlawhna pawh a tel.
India bakah hian ram dang 11 hnenah a ralthuamte a thawn chhuak dawn a, heng zinga India a tel hi New Delhi leh Tokyo-in ralthuam siam lama thawhhona an neih kal zel a ni.
Japan-in a ralthuam a thawn chhuah khapna dan chu nakum March-ah hian thlahdulin India, Australia leh Europe Asia chhimchhak lam ram thenkhat hnenah a hralh dawn niin Nikkei chuan a tar lang.
Japan hian an ralthuamte hi kum 2014 atang khan thawn chhuah a khap a. Thlahdul hret tawh mah se a tha bik leh lethal weapon an tihte chu a la khap thung.
India hnena Japan-in a ralthuam a thawn tur sawi awm hi Prime Minister Narendra Modi leh Japanese Prime Minister Fumio Kishida ten Thawhlehnia Tokyo-a Quad Leaders Summit neiha ram venhimna lama thawhhona tur an pawm hnu lawk a ni a. Thawhhona tur zingah hian hmanraw siam dunte pawh a tel a ni.
Nikkei chuan Japanese sorkar hian ‘China lian zel tur lo dan nan ram dangte chu thawhpuiah siamin Tokyo himna tur a ngaihtuah’ niin a tar lang a. Thawhpui atana a tih zingah Vietnam, Thailand, Indonesia, Malaysia, Philippines, United States, Britain, Germany, France leh Italy te pawh an tel.
Kum 2014 atanga tih dan phung tur an zamah chuan an thawhpui ni lo ramte hnena ralthuam leh thil dang hmanrua – mi chhanchhuahna, inkalpawhna hmanrua, inralring tura tihna, mi thlithlaina leh rah puah bomb ang chi hai lanna ang chite chu thawn chhuah khuahkhirh a ni.
Kalphung thar an neih turah erawh ralthuam thawn chhuah chu Japan sorkar kalphung tur, eibar leh sum leh pai lama indinthara insiam tharna tura an duan a ni a, June thla hian peih hman an tum.
Kalphung thar tur hi kumin kum tawpa an ram National Security Strategy-in an en leh hnuah peih fel a ni ang.
India leh Japan hi Indo-Pacific huang chhungah hian thawhhona tha tak neiin China-in kawng hrang hranga a nekna leh heng lai vel a tihhim lohna laka veng turin hma lak zel an tum a ni.