Human Resource Development Board, Vice Chairman L. Thangmawia’n Govt. Hrangbana College conference hall-a Thu leh hlaa intawh- khawmna (College level poetry festival) buatsaih chu nimin khan a hawng a, Govt. Hrangbana college, Literature club lehkhabu buatsaih ‘Zirlaite hril-hla (Anthology of Poetry)’ tih chu a tlangzarh bawk.
L. Thangmawia chuan “Mizo Language development board din a ni mek a, hei hi literature lam tui mi te tan chuan thil tangkai tak, kan Inpui tur a ni dawn a ni” a ti a. Zofate inpumkhatna atan literature aia țangkai tur a awm bik chuanglo nia sawiin, “Mizo țawng hi min țhendarhtu ni lova Zofate min suihkhawmtu tur zawk atana kan țawng ințawm (common language) a kan pawm tlan a ngai a ni” tiin Zofate țawng hrang hrang pawh ngaihpawimawh a țul thu a sawi.
HRD Board Vice Chairman chuan “Tun kan hun hman mekah hian insawiselna leh a thim zawnga thil thlirna hian min chiah hneh hle niin a langa, a eng zawng leh a infuih phur zawng leh a insiamțha zawnga thlirna kawng pawh literature lama tui mi ten kan hnam kal zel tur atana thil țangkai tak a nih avangin tan la turin ka ngen che u” a ti a. “Kan ramah hian țhalai fel tak tak, zirlai taima tak tak, officer leh sorkar hnathawk țha tak tak leh politician țha tak tak te tam tak an awm a ni. Chuvangin insawiselna lam leh infuih tawnna lam hi a inbuk tawka a kal hi thil țul tak a ni” L Thangma- wia chuan a ti bawk.