Mizoram Football Association chuan Zirtawpni khan ynod Conference Centre, Aizawl ah Annual General Body Meeting an nei a. Mizoram district hrang hranga football association hruaitute nen football hmasawnna tura rawtna hrang hrangte ngaihtuahin an rel.
He Annual General Body Meeting-ah hian Lalzirliana, MLA, Vice Chairman, Road Infrastructure Development Board chu khuallian a ni a. Dr. K. Pachhunga, MLA chu khual zahawm a ni ve thung.
MFA President Lal Thanzara chuan MFA khawmpui palaite lawmna thu sawiin kum hnih vel zet inelna a kal theih loh hnua football in ngai a awh leh ta chu lawmawm a tih thu a sawi a.
District football association hruaitu thar te chu thatho taka thawk zel turin a ngen a. Mizoram a football zirna sikul tha Tata Trusts Center of excellence tawp ta chu MFA in a uizia a sawi bawk.
MFA Honorary Secretary Lalnghinglova Hmar chuan kum kalta chhunga report a pe a. Hrileng a ziaawm hnua kuminah inelna kalpui a nih chhoh leh dante, Saitual DFA in MFA Cup 2022 hlawhtling taka an thlen dan te, Mizoram women’s team in National Senior Women’s Championships a semi final an thlen chhoh dante, AFC-AIFF C License course hlawhtling taka buatsaih a ni leh ta te, Hnahthial a Inter District Junior Boys Championship khelh a nih thu a sawi.
MFA hian All India Football Federation hnuaia Match Commissioner pahnih Lalrawngbawla leh R. Malsawma bakah National Referee F. Zohmingliani te hnenah lawmpuina leh chawimawina an hlan a, mual liam ta T. Vanlalhluna, Executive Committee member sunna hun an hmang bawk.
MFA Annual General Body Meeting ah hian chawhnu lamah District hrang hrang atanga rawtna lut te sawiho a ni.
Thurel tlangpui :
- Sairang Dinthar a MFA Ground kiangah Hostel sak mek a ni a, hei hi zawh fel a nih hunah MFA chuan Residential Football Academy din a duh a, vawiina MFA Annual General Body Meeting chuan hei hi a pawm pui a ni.
- Mizoram-ah Centralised Registration System (CRS) hman tura rawtna chu pawm a ni bawk.
- Referee tam zawk kan neih theih nan DFA tin atangin member tel zat tur tukin Development Course neih ni rawh se tih chu pawm a ni bawk.
- Kum 2022-2023 season thara MFA Cup thleng turin Khawzawl DFA thlan an ni a.
- Junior Boys (Under 17) championship thleng turin Kolasib DFA ruat an ni.
- Inter District Women’s Championship khelhna tur chu ruahmanna la siam leh tur a ni ang.