- Lallunghnema, Charity Lodge
Vawiin May 30.hi CONSUMER SOLIDARITY DAY a ni a. He Day pual hian vawiina ka ariticle hi ka hlan a. Chhiartute pawh he Ni denchhen hian chibai ka buk a ni.
Consumerte chanvo sual chhuahna kawngah hian keimahni consumerte bawk hi tangruala inpumkhat tur kan ni.Mahse,tanrual a har em em a,khawvela mize chi hrang hrang tamna ber chu Consumerte hi kan nih vangte pawh a ni hial awm e.Thil man sang zel tur dona kawngahte,bungraw chhia,hman tlak loh lei thu hlaahte hian kan la inthurual thei lova.
Gas home delivery chungchangahte pawh hian kan inthurual a tul em em a ni. Chutih laia Consumer thenkhatin L P Gas Home Delivery an lo duh lo tih thawm a awmte hian mipui dikna leh chanvo veitute rilru a lo buai thin a ni. Heng ngaihdan mawl takte avang hian gas home delivery hi a ho der thei a ni.Gas hi lak dawnin buktir ziah tur,Gas laknaah cash memo lak ziah tur Sawrkar leh Consumer Pawl lamin ti thin mahse,buktir peih miah lo,buktir duh miah lo,cash memo ngai pawimawh lo hi a tam zawk an ni thin.
Gas chan loh hlau reng rengin kan phili buai thin a nih hi!Eng lai pawh a,kan tana tha tur ai chuan tuna hrehawm deuh tuar kan peih thlawt lo hi,a mangan thlak tak zet zet a.ni.
*Maximum Retailed Price aia sangin thil lei loh tur tia mi thahnem ngaiten min zirtir mawlh mawlh laiin, a pawisa nei ber ang maia thawin a zuartute chhiar ang angin kan lei ang phawr phawr a.Chumi piah lamah chan loh hlauvin kan han inchuh talang a ! Kan zahpuiawm ngawt nia maw le.Vawksa lei tum, nutling patling han inchuh phei chu,an innek lui lui a,an innawk lui lui a.Kristian nu leh Kristian pa tih an ni vek si.Biak In a, a lam uar uar an la ni leh ta dah!Smart consumer an tih leh Assertive consumer an tih thin ang hi chu kan hlat rih hle.Duhamna a khat Isua hnungzuitu intiho zia hi kei mi berh te hian ka hre thiam thei mawlh lo a ni.
Consumer Movement a kan harh chhuah theih nan tawngtai standing subject zinga pakhat atan i thawh hial teh ang u.Sualna chi hrang hrang do nan hian a tha em em a ni.Consumer Solidarity Day pawh hi mipuiin hlut thiam ila,keimahni tan zel a nih hi!
Tunah chuan,Consumer mi huaisen Pu Lianzama tawn hriat thenkhat chungchanga kan in kawmna hi i lo ngaithla teh ang u.
Zawhna: Pu Zama,hei kan Inah i lo leng a,ka lehkhabu hi ka present ang che a.Tlem lai deuhva i thil lei i thleng leh dan kha tawiteiin min han hrilh ta che.
Zama : Kumin January thla lai hawl khan Vaivakawna Damdawi dawr pakhata mi Damdawi ka lei a.Cash memo pawh ka la thlap a.Mshse,kan in ka thlen hnu chuan ka Damdawi lei chu ei mai ka han tum a.Ka han en chian chuan Expiry date pel tawh a lo ni a.
Zawhna :Chu i ei ta tho nge,I kir leh ta em ni?
Zama: Ei ngam teh nang,ka thinrim hle a .Ka insiam sawk sawk a,Vaivakawn a ka Damdawi leina dawr chu ka pan leh ta vang vang a ..
Zawhna: Chu…engtinnge an lo tih che.An lo hau hrep zawk che nge,an inthiam lo?
Damdawi chu i pe let leh em ni?
Zama : An dawr ka va thlen veleh khan thil awmzia ka sawi a Ka thinrim bawk a,ka ang deuh nghe nghe a ni .Heti hian ka ti.
“Hei nichin lawk khan in Damdawi hi min leitir a.Cash memo pawh ka la thlap a.Ei ngam a ni reng reng lo,expiry date pelh hnu a ni a.Hetiang hi zawrh leh hralh khap a ni a.Dan bawhchhiatna a ni asin.Consumer Protection Act kalh a ni.Consumer Courtah ka khing thei che u a ni.Chuvangin he thil hi ka return duh a.A aiah pawisa min kir leh a ngai a ni,” ka ti ta a. Dawr nghaktu chuan mi hnial a tum deuh va, damdawi dang min pek a tum a. Chu pawh chu ka hnial leh ta zel a. A tawpah chuan, ka pawisa chu min pe kir leh ta a ni.
Zawhna: E, i huaisen hle mai.I dikna leh I chanvo i champion-pui a nih chu! Hetiang tur hi a ni.Nang hi chu consumer tam takin kan tluk lo che a ni.Nang ang hi Zoram hian a mawh a ni.
Kha zawng kha kan rawngbawlpui Consumer pasaltha Pu Zama nen a kan inbiakna chu a ni e.Bengvarthlak in ti em?
Nikum lamah pawh khan he pa huaisen hian Aizawl Bazarpuiah buk tling lo thil a lei chu a buk thattir thu he Column-ah hian ka ziak tawh nghe nghe a nih kha!
Kan thupui dangah kan lut nghal ang.
Khatia defective bike an hralh avang khan bike leitupa chuan Vishakhapatnama District Consumer Disputes Redressal Commission pakhat hmaah Hamsa Motors Private Ltd chu a khing a.Consumer Commission chuan thutlukna siamin Hamsa Motors Private Ltd chu bike leitu,complainant hnena Bike thar pe turin thupek a chhuah a.Hei bakah hian Rs 40000/- a chawi ang. Chubakah Consumer Commission hnena thubuai thehluhna a senso rulh nan Rs 2500/- a chawi bawk tur a ni. Commission hian defective vehicle hralh hian unfair trade practice leh deficient service a, ‘constitute’ a ti a ni.
Hetiang thu ka sawi chhuah thin hi Consumer Advocate Group WhatsApp atanga ka dawn a ni thin a.Keini helaia Zo Consumerte lo hriat atan leh kan lo inzir ve nan ka han buatsaih a ni.
Consumer Court chak kan mamawh hle. Hruaitu huaisen kan mamawh hle. Consumer huaisen kan mamawh leh zual. Mamawh pathum tangrual chu tu’n nge do thei ang le?