Southwest monsoon tia an sawi, India rama furpui ber chu Pathianniah khan Kerala-ah a thleng tan ta a, a hun pangngai thin, June 1 aia ni thuma hmain a thleng niin weather office chuan a sawi.
Lo atanga thar chhuaha innghat, India chuan southwest monsoon hi a ram sum leh pai hnar innghahna ber a ni.
“Southwest monsoon chu Pathianni khan Kerala-ah a thleng ta a, June 1-a thleng tura tih aia hma ni thumah a thleng a ni,” tiin India Meteorological Department (IMD) Director General Mrutyunjay Mohapatra chuan a sawi.
A hmain IMD chuan Kerala-ah hian May 27-ah a thleng hman dawn niin an lo sawi lawk tawh a. Hei hi chawlhkar hnih liam taa Bay of Bengal-a thawk, Cyclone Asani châmbâng vanga hma tur angin an sawi a. A hun pangngai aia ni li vela hma turin an sawi lawk hi a dik lo deuh ta a ni.
An sawi ang hunah chiah thleng lo mah se Asani châmbâng hian sik leh sa vir vel erawh nasa takin a nghawng tho a ni.