Durtlang North in Pro Volleyball final vawi hnih an khelhnaah an chesual nawn tawh lova. Zirtawpni zanah an khingpui Thutak Nunpuitu Team 25-20, 23-25, 25-21, 25-23 (3-1) a hnehin Zothan Autoworks Pro Volleyball League-ah an champion.
Durtlang North tan hian hun pawimawhah Lalbiakmuana a che ṭha a, point 19 thawk chhuakin vawi li chiah a tisual a, D3 Business Player of the Night-a thlan niin Sagar Malik chuan an champion theih nan hmun pawimawh a luah bawk a, point 28 hmuin 17 a hloh.
Durtlang North hian league kharnaah team inpumkhatna thar lantirin set thum set khat thovin TNT lakah an chak tawh a. Inrintawkna nasa tak neiin final an hmachhawn.
Final inkhelah hian team pumin an kheltha a, an tanrualna chu an chak chhan a ni. Setter beiseiawm C Zonunmawia’n boruak sangah chiai lo takin ball a vawrh a, Vanlalmawia’n point 11 hmuin point thum a paih a, Fabian Lallunghnema’n vawi khatin tisual tam zawk mah se point 11 tho a hlawh a, Vanlalṭanpuia’n point hnih chauh hlohin point riat a thawk chhuak.
TNT-in semifinal-ah rin hlawh Hunthar an hneh avangin an lakah beiseina a sang a, a vawrtawp boruak nasa leh inelna sangah an khel ṭha chhunzawm zo lo.
Rinrawl pahnih Vanlalṭanchhana leh Zosangzuala ten Pro Volleyball-ah tawn hriat tlachhamin a hmaa an khelh dan an phak lo ve ve a, set khatna an hloh hnuah beiseiawm takin kir leh nghal mah se set thumna laihawl aṭangin Biakmuana leh Sagar an dang thei lo va, set linaah bei let viau mah se tawn hriat nei zawk Durtlang an hriam zawk.
Pro Volleyball hmasa ber 2016 ang bawkin TNT-in a tawp an chuang chhuak zo lo va, final-a vawi hnih tlawm hmasa ber an ni. Valbuanga’n point 18 hlawhin point sarih a hloh a, Zosanga’n vawi 15 vaw tlain ṭum li a tisual.
Pro Volleyball vawi nga neih tawhah Durtlang North-in vawi hnih champion tawh Hunthar, 2016 champion Anastasia leh 2019 champion Chhinga Veng zuiin trophy la thei palina an ni a; TNT erawh champion lo zinga final khel zing ber an ni ve thung.