Europe-ah lal hlun bawk an lal leh a. UEFA Champions League final-ah Real Madrid in an club chanchin a vawi 14-na ni turin champion trophy an chawi a. Inrinni zanah Liverpool 1-0 in an hneh.
Paris khawpui a Stade de France a inkhelah Real Madrid in Vinicius Junior hmangin goal an khung a. Minute 58-naah goal khungin Liverpool in an sut thei lo.
Phuba an la lo
Kum 2018 final-ah club pahnihte an intum tawh a, Liverpool chiang takin an tlawm. Hemi tuma Liverpool team a khel player thenkhat an la awm a, an tihsual siamthatna hun niin an ngai.
Mahse final inkhelah erawh an tum a hlawhtling thei lo. Liverpool in na takin goal an nawr a, mahse Champions League chanchin a coach hlawhtling Carlo Ancelotti-a thluak avangin Real in an ti fuh.
Liverpool veng turin team a rem a, first half-ah English club ngam lo hle mahse a hnung berah an goalkeeper Thibaut Courtois chu Reds in an paltlang thei lo.
Belgian goalkeeper hian Liverpool lakah save tha vawi 9 lai a siam a. Mohamed Salah goal khung tur a dansak ngun malh malh hle.
Bet zawk mahse Real Madrid nawr let a hlauhawm thin thova, Vinicius leh Karim Benzema inkawp an hlauhawm thin. Second half-ah Real an insiamtha a, minute 58-naah Ancelotti-a’n fing taka dinglama a khelh tir Federico Valverde chuan ball tha taka cross lutin Vinicius-a’n goal-ah a khung.
Real in goal an neih hnuah Reds in an nawr na a, mahse awmzia a nei thei lo. Real tlarhnung an fakawm a, Courtois chu chhandamtu a ni.
Europe lal nge nge
UCL chanchin a team hlawhtling ber an ni a, kum 8 chhunga vawi nga nan an champion.
Tun tuma an zinkawng a awlsam lova, Paris St-Germain, Chelsea leh Manchester City lakah a bet zawk a tang chungin hnehna an chang vek a. He Real tan tang rei thei lutuk leh an football fing avangin fak loh theih an ni lo.
Final-ah Courtois bakah right-back Dani Carvajal leh defensive midfielder Casemiro te an kheltha hle a. Liverpool player-te hlauhawm theih loh chhan an ni.
Reds in high-press an khelh thin khel lehin inkhel thunun mahse Real midfield atangin an tlarhma te tan ball tha a tlang leh zawk zawk thin.
Real coach Carlo Ancelotti fak loh theih a ni lova, UEFA Champions League trophy manager angin vawi li a chawina a ni a, ani aia chawi hnem an awm lo. Player angin AC Milan tan vawi hnih a chawi tawh bawk.
“Season duhawm tak kan hmang a, kan thawhrimna a tha a, he hlawhtlinna hi kan phu a ni. Inkhel a hautak a, a bet zawkah kan tang nasa hle, a bikin first half-ah. A tawpah erawh chak zawk nih kan phu.” a ti a.
“Tun season hi season ropui tak a ni, inkhel hautak tak tak kan paltlang a, kan fans ten nasa takin min pui thin bawk.” tiin a sawi a. Courtois khelhthatzia sawiin a awihawm loh zawk tiin a fak.
Liverpool boss Jurgen Klopp chuan, “Final luh hi hlawhtlinna chi khat a ni a, final-ah hian min hmu leh thuai dawn tih rinna lian tak hi ka nei bawk.” tiin an chak loh hnuah a sawi.