Israeli Juda sang rual chuan Jerusalem-a khawpui hlui zawka Muslim awmna hmun paltlangin kawng zawh tumin an inbuatsaih mek a. Palestinian-te chuan he thil hian tharum thawhna a thlen thei niin an sawi ve mek.
Kum tina neih thin kawng zawh hi kumin bikah chuan ngaihven a hlawh a, tun hnaia tharum thawhna rapthlak tak tak a thlen vang a ni.
Flag March an tih hi Israel-ah chuan Jerusalem Day an tihah neih thin a ni a, kum 1967-a indona chhuaka East Jerusalem an lak champha a ni.
Israel hian Jerusalem pum hi an khawpuiah an chhal a, ram dang tam tak leh Palestinian-te erawh chuan an pawmpui lo thung.
He khawpui hi Israel-Palestinian buaina laimu ber a ni a. Palestinian-te chuan Israeli-ten an luah lai, East Jerusalem chu nakina anmahni puala ram an neih ve huna an khawpui tura an vauchhr a ni a, Israel erawh chuan khawpui hi thendarh a ni tawh dawn lo niin an sawi ve thung.
Pathianni tukah khan Old City-a hmun thianghlim awmna laiah chuan buaina a chhuak deuh va, Palestinian-ten police-te chu halpuah leh lungin an vawm a; police hian stun grenade hmangin an vawm bawk nia sawi a ni.
A hnu lawkah Jada eng emaw zat, far-right MP Itamar Ben Gvir-a hovin he hmunah hian an thleng nghal a. Thenkhat an lâm a, Israeli flag vaiin an tawngtai bawk a, a hnuah police-ten an titawp a. Palestinian-te thlirna atang chuan hetianga an chevel hi anmahni hmuhsitna a ni a, hel pawlte pawhin hetiang hi an en liam mai mai dawn lo tih an sawi.
Juda leh Muslim ni kher lote pawhin helai hmun thianghlim hi tlawh theih hun an nei a; mahse, a hmun enkawltu Muslim-te chuan tawngtai emaw, sakhaw thiltih emaw, ram chhinchhiahna thil tihlan hrim hrim chu an phal lo va, hei hi hun rei tak ata tawh an lo kalpui a ni.
He hmunah hian Muslim-ten Haram al-Sharif (Noble Sanctuary) an tih, al-Aqsa (Qibli) mosque pawh a awm a, hei hi Islam sakhaw hmun thianghlim ber pathumna a ni a. A tlang chhipah Judate Temple Mount awmin Judaism tana hmun thianghlim ber a ni ve bawk.
Nikum khan Israel leh Palestinian helho hi ni 11 chhung Gaza-ah an indo va, hei hi Jerusalem Day atanga intan niin Gaza awptu Hamas-ten rocket hmanga hmun thianghlima Israeli police leh Palestinian-te innawr an kah vang a ni.
Kumin kawng zawh hi Damascus Gate paltlangin, Muslim Quarter pawh paltlangin Old City lut tura ruahman a ni a, hei hi Palestinian-ten an duh lo hle a ni.