Real Madrid captain Marcelo chuan tun nipuiah club a chhuahsan tur thu a tichiang.
Brazilian left-back hian Inrinni zana UEFA Champions League trophy a chawi hnuah a hma hun chungchang hi a sawifiah a. Real Madrid chanchin a player hlawhtling ber ni turin trophy 25 Los Blancos tan a chawi hman.
Marcelo hian inkhel zawh veleh a hma hun chungchang lam thui tak a sawi zui duh lova, “Ka hlim a, rilru ah thil tam tak a awm. Thu a sawifiah a harsa a, he season a kan hlawhtlinnate hi kan phu. Rilru-ah erawh thil tam tak a awm a, Champions League vawi nga ka chawi ta a, hetiang hlawhtlinna hi ka nei ang tih ka ngaihtuah pha ngai lo.” tiin a sawi a. Trophy hlanna te an neih fel hnuah erawh Marcelo hian a chhuah tur thu hi a sawi chiang.
Kum 34 mi Marcelo hian kum 18 mi a nihin kum 2007 January khan Real Madrid hi a seilenna club Fluminense atangin a zawm a. An tan match 546 khelin goal 38 a khung a, a vanglaia khawvela left-back tha ber a chhal a ni thin.
Spanish club-ah hian a khelh chhungin UCL title vawi nga bakah Club World Cup vawi li, European Super Cup vawi thum, La Liga title vawi ruk, Copa del Rey vawi hnih leh Spanish Super Cup vawi nga a la hman.
Hetihlai hian Real Madrid veteran midfielder Luka Modric erawh kum khat dang khel leh turin contract an tifel ve thung.
Kum 36 mi Modric hi tun season-ah Real tan midfield luahtu pawimawh a la ni a, a hlawh ngai hlawh turin kum khat dang ziah belh turin inremna an nei tawh.
Kum 2012 a Tottenham atanga Real Madrid zawmtu Modric hian an tan vawi 436 a inkhel tawh a, Champions League trophy vawi nga a chawipui tawh.