AIZAWL: Sports Minister Robert Romawia Royte chuan social media vela thu kimchang lo leh belhchian dawl lo laka fimkhur turin mipui a ngen.
Inrinni khan Robert Romawia Royte hian Haulawng khuaa Lawhleng chanchinbu kum tlin lawmnaah khuallian niin a hman pui a. He hunah thu sawiin kawng hrang hranga media tihmasawn turin sorkar chuan theihtawp a chhuah zawl dawn tih a sawi a. Media mite chu thu dik tan tlat a, thlei bik nei loa thu puang darh thin turin journalist te a chah.
Social media kaltlangin thu kim chang lo leh belhchian dawl lo, mipui rilru a dik lo lama hruai thei te a darh nasa tawh tih sawiin, “Hemi lakah hian mipuite kan fimkhur a, social media hman thiam pawh kan inzir a tul tak zet a ni,” tiin, mipuite’n hriatna an lakna kawngah fimkhur a ngaihzia a tilang chiang hle tih a sawi.
Robert Romawia hian chanchin thar rintlak leh belhchian dawl ti chhuak thin a, mipuite tana chhawpchhuak thin tu chanchinbu te chhiar uar thar leh a, cable TV news a puan te ngaihthlak thin a tul hle tih a sawi.
Sports Minister hian Haulawng khuaa Keitung Tlanga khelmual tura beisei hmunhma chu NGO leh khawtlang hotute nen an tlawh nghal bawk a. Hei bakah, Haulawng field leh volleyball court chu cheng nuai 30 senga siam that thuai a nih tur thu a puang nghal bawk.
He huna khualzahawm MJA General Hqrs President C.Lalrambuatsaiha pawhin thu sawiin, “Khawvelin Journalist te hi a ngai pawimawhin a ngai hlu em em a, ‘The Fourth Estate’ tih hiala koh niin kan ram inrelbawlna democracy vawng nung zel turin an pawimawh takzet a ni,” a ti a. Journalism chu hna hautak leh hahthlak tak a ni tiin social media chak tak karah journalist te pawh dikna tan tlat chunga hna thawk zel turin a chah a ni.
Lawhleng Nickel Anniversary-ah hian Haulawng VCP Laltlanmawia Chhakchhuak, Lawhleng editor Lalhmachhuana Ralte leh Lunglei DIPRO C. Lalremruati-ten thu tawi sawina hun an hmang bawk a. District hrang hrang atangin journalist thahnem tak an tel a ni.