- Mahmuaka Chhakchhuak
Tuk khat chu Lunglei Venglai, PWD Office peng bul lawkah hian Scooty-a ka din lai hian School naupang pakhat hian ‘ka pu, dar engzatnge ni tawh?’ a rawn ti a, kei chuan ‘dar 8;10 chiah a nih hi’ tiin ka lo chhang a. Chumi hnuah chuan ka piah lawk step-ah thuin nghah nei ni awm tak hian a hawi a hawi mai a, minute 10 vel hnuah chuan ‘mama, tunge i nghah’ tiin ka va au a, a ni chuan School Bus number two ka nghak a, hei a tlai tawh riau mai lehnghal a’ a ti a, kei chuan ‘tlai ta sela engtinnge i kal ang, khawi lai nge in school chu a awm’ ka han tih leh chuan ‘Baptist Higher Secondary School, Serkawn a ni a, ka thiante hian min kalsan vek nge ni ka hrethiam lo’ tia min chhan leh chuan ka khawngaih deuh bawk nen ‘keima’n ka han thlah mai ang che’ tiin Serkawna an School thleng chuan kan inphur chho a. Scooty atanga a chhuk hnuah chuan thiam lo chung chungin lawmthu min han hrilh a, Class VI zirlai mai chauh mah nisela lawmthu min han hrilh luam chu fel ka ti reuh hle mai.
Ka let thlak leh lamah chuan ka ngaihtuahzui neuh neuh a, Lunglei Venglai atangin Serkawn lam khera School a kal chhan hi eng nge ni ang a, engatinge a panna hnai zawk Sorkar School (Middle School) leh Secret Heart School emaw School dangah emaw te pawh a kal mai loh le aw tihte ka ngaihtuahnaah a awm a. BHSS, Serkawn hi Lunglei khawpuiah chuan School tha ber zing ami a niin kohhran School bawk, Secret Heart nen hian an dinhmun a chungnung dun hle thin a, hetia a hla zawk leh panna hrehawm daih zawk Serkawn lam khera an fate an kal tir hram hram hi ka hriatthiampui viau tho mai. Aizawlah ngei pawh St. Paul’s HSS, Tlangnuam hi School tha berte zinga mi niin hmun hla tak tak atangin an pan khawm a, vawi khat pawh Pu Ruata Sailo te In, Durtlangah ka riah tumin a fanu School kal a ngaih bawk si avangin St. Paul’s HSS-ah pan turin breakfast eiin zing dar 7;00 velah chuan kan chhuak daih mai a, Pu Ruata ngei pawh Office lamah kal nghalin midang zawng aiin a thleng hmain hnathawhna hun pawh a ngah phah zawk thei a. Pu Ruata fanu hi tun HSLC 2022 result chhuakah khan Top Ten-ah lang phain pariatna a ni nghe nghe a, ka lawmpui hle a ni.
Tunhnai lawka High School Leaving Certificate Examination, 2022 result chhuakah khan Top Ten-ah mi 17 lai an awmin, chungte chu School hrang hrang panga (5) atanga zirlaite an ni a. Nimahsela heng School-te hi kohhran leh mimal School te chauh an niin sorkar School an tel ve lo erawh ngaihtuah a ti thui ta deuh a, a zia lo hle mai. Chipchiar zawk deuhin han sawi ta ila: Top Ten-ah hian St. Joseph HSS atangin Pakhatna (1st), Pangana (5th), Parukna (6th) leh Pariatna (8th) an awm a, St. Paul’s HSS atangin Pakhatna (1st), Pahnihna (2nd), Pathumna (3rd), Parukna (6th) pahnih, Pariatna (8th) pahnih bawk leh Pakuana (9th) te an awm a. Mt. Carmel School atangin Palina 4th), Pangana (5th) leh Pasarihna (7th)te an awm a, Lalthanmawia Hermon School atangin Palina (4th) awmin Holy Cross School atangin Sawmna (10th) a awm bawk. Hengte hi kan hriat theuh angin Kohhran leh mimal School te an ni hlawm a, kum dangahte pawh result tha tak tak an lo nei fo tawh bawk thin a ni. Management wise ang pawhin han sawi nghal law law ila: Govt. School atangin 58.12% an pass a, Deficit School atangin 88.39 % in an pass bawkin Aided School atangin 62.79 % in an pass bawk a. Lumpsum School atangin 68.18 % an pass bawkin Private School atangin 79.79 % an pass a, anni bakah hian Private Candidate 51.11 % in an pass bawk a ni.
Sorkar hotu lam atangin zirna tha chungchang pawh sawirik fo a niin zirtirtute thlabi hlawh pawh School dang zawng aiin an pe tha bawk a. Chuti chung chuan a pawimawh lai ber leh School hmel lanna ber tur an result berin hnung lam a chan fo mai chuan hruaitute nge dik lo ang a, zirtirtute zawk ni ang a, an School naupang zawkte hi dik lo ni ta ang tih hi ngaihtuah ngai tak a ni awm e. Zirlai naupangte chu kan dem thei hauh lo ang a, zirtirtute hi dem tur ber zawk tur chu an nih hmel a, heti taka zirtirtu dang zawng zawng aia hlawh an la tha chunga School dangin result lama an khum fo mai hi inenfiah an ngai hle tihna a ni. Sorkar School te hi tun dinhmunah chuan tunlai tawng takin ‘titia distinction’ tih ang chauh mai an ni tihna a ni thei a, an hlawhchham tihna a ni thei hial. Chuvangin sorkar lam atangin hruaitute hian tawngkam mai niloa khauh zawk leh huaisen zawka hmalakna a neih a ngai hle mai a, heti chuan kum leh zelah pawh nu leh pa tam takte hian an fate School dangah an luh tir ang a, sorkar School ber hian naupang a nei mumal lo palh hlauh thei a ni.
Kum dangah leh tum dangahte pawh sorkar School te hian Private School te hi result lamah alo pha lo fo tawh thin nia hriat a ni a, zirtirtute hlawh atana sorkarin sum leh pai thahnemtham tak a seng reng chunga hetia School dang aia result tha lo lam an neih fo mai si chuan engemaw fello a awm tihna a ni ngei ang. Sorkar School-a zirtirtu nih hi thil har tak a niin paltlang ngai pawh a tam a, School dangte aiin hamthatna pawh a tam zawka ngaih a ni. Hetianga result tha lo an nei fo mai hi zirtirtute inenfiahna tur tam tak a awm ngeiin a rinawm a, sorkar lam atang pawhin ngawi rengin thlir liam mai mai lo sela a thain a rinawm. School tha leh tha lo enna chu a result a nih ber avang hian tuna HSLC result chhuakah ngei pawh hetia sorkar School-in hmun chungnung an chang leh ta lo hi a pawi hle mai a, mi tam zawk ngaihdanah chuan zirtirtute inthlahdah leh fel tawk loh vang em ni ang a tihlohtheih loh a ni. Sum leh pai lamah chuan School dangte aiin alo hautak lo zawk pawh a ni ang a, enkawlna leh thil dang dangah pawh alo tha zawk pawh a ni ang a, nimahsela zirlaibu in ang reng chunga hetia rim taka thawk chunga hlawh tlem zawk lehnghala zirtirtute thawhna kohhran leh mimal School dangtein a lehpel ta fo mai hi chu sorkar lam atang hian enfiah vat nisela a dik lo lai leh a fello laite siamthat vat ni ngei rawh se.