Tottenham head coach Antonio Conte chuan season tharah club a enkawl chhunzawm zel dawn.
Italian coach hian Spurs hi season tharah Champions League khel turin tlin pui mahse club a enkawl chhunzawm zel ang em tih zawhna a awm a. Nimahsela tunhnaiah club neitu ENIC in Pound maktaduai 150 club a an chhun avangin Conte hian hna thawh chhunzawm a duh rinna a lian sawt hle.
Conte hian Zirtawpni khan director of football Fabio Paratici nen inbiakna neiin club-ah hnathawh chhunzawm zel a inhuam thu a hriattir tawh a, contract ziah belh lam erawh a sawi lo.
Kum 52 mi hian nikum November atang khan Tottenham hi enkawl tanin kum 2023 thleng contract a nei a, kum khat ziah belh theihna a awm.
February thla khan Spurs chetchhiat avangin club dinhmunah a lungawi vek lo niin a lang a, amah ngeiin club dinhmun a siamthat theih loh chuan chhuah mai a hnial loh thu a lo sawi tawh.
Hemi hnuah hian Spurs in player an lakluh dan chu a sawisel niin a lang bawk a, mahse amah ngeiin chuan he thu hi a hnuah a pha leh thung.