Aizawl: Excise & Narcotics Department (END) chuan hmun hrang hrangah heroin an man.
May 29, 2022 tlai dar 3:10 khan END hian Hunthar vengah heroid gram 262 (hawng 20) leh a neitu nia puh mi pathum – Vanneihmawiia (22), Phunchawng Mel 7; Lalthazuala (26), Champhai Vengthar leh C. Lalrinliana (29), Phunchawng nia inchhalte chu an man a, The Narcotic Drugs & Psychotropic Substances Act, 1985 tlawnchhanin thubuai siamsak an ni a, Special Court (NDPS Act)-ah hruaiin Central Jail-ah dah luh an ni.
END hian kar liam ta (May 22-28, 2022) chhung khan hmun hrang hrangah herion an man hnem hle a. Serchhip-ah heroin hi tum nga zet an man a. He’ng an man te hi gram 88.030 a ni. Lunglei-ah tum hnih manin gram 38.680 a tling a. Siaha-ah tum khat manin gram 13.620 a tling bawk.
END hian Mizoram hmun hrang hrangah herion man tur a awm tak reng avangin mipuite, tlawmngai pawl leh kohhran hrang hrangte chu ruihhlo leh a kaihhnawih bakah a zuartute dapchhuahna kawnga an theih ang anga tawiawm zel turin an ngen.