Nepal-a chhanchhuah hna thawktute chuan Indian pawh pali an chuanna thlawhna te chi tlakna hmunah ruang 14 an hmu tawh tih Thawhtanni khan airport thuneitute chuan an sawi a, mi dangte pawh an zawng mek zel bawk.
Nepali carrier Tara Air thlawhna tla ruang hi Nepal hmar lama Mustang district-ah hmuh a ni.
Passenger thlawhna hi Pathianni chawhma khan minute 20 chauh thlawk tura zin chhuak a ni a, an tum hma minute nga chauh a awm tawh tihah air traffic control chuan a bepawp thei ta lo a ni.
Mi 22 an chuang a, thuneitute chuan mi dangte pawh hi an zawng mek zel tih an sawi.
“Tunah hian ruang 14 hmuh a ni tawh,” tiin an ram Civil Aviation Authority thupuangtu, Deo Chandra Lal Karn chuan AFP a hrilh a. “Khua nuam lo hle mah se an tlakna hmun hi kan team-in an thleng thei a ni,” a ti bawk.
Twin Otter 9N-AET thlawhnaah hian Indian pali bakah German pahnih leh Nepali 16 an chuang nia sawi a ni a. Airline-in mi chuangte hming a tihchhuah atangin Ashok Kumar Tripathi, Dhanush Tripathi, Ritika Tripathi leh Vaibhawi Tripathi te chu Indian an ni tih hriat a ni a, Mumbai-a cheng, inchhungkhat an ni.
Chin hriat lohva a awm veleh khan a zawn hna thawh nghal a ni a; mahse, khaw awm danin a zir loh em avang leh tlangram khawkrawk tak a nih bawk si avangin Thawhtanni tukah khan an chhunzawm thei chauh a ni.
Nepalese Army thupuangtu chuan Twitter-ah thlawhna keh darh thlalak a tar chhuak a, a banga 9N-AET tih inziak pawh hmuh theih a ni.
“Mi zawng leh chhanchhuaktu sipaite chuan an tlakna lai hi an thleng tawh,” tiin Narayan Silwal hian Thawhtanni hma takah khan Twitter-ah a tar lang a, darkar 24 dawn an beih hnuah zawng hmuin a hmun an thleng niin a sawi.
Thlawhna tla ta hi Canadian aircraft firm de Havilland siam niin khualzinten an tlawh nasat tak khua, Pokhara atangin an ram sanaa chawhma dar 9:55 (India chawhma dar 10:40) vela thlawk chhuak a ni a. Khualzinte tlawh thin tho leh biakzinte tlawh thin, Jomsom pan tur a ni.
Tara Air hi Nepal ramah chuan ram chhunga thlawh kual nana an hman nasat ber a tling a. “Nepal-a airline dang tu mah keiniin hmun kilkhawr, STOL (short takeoff & landing) sector-a kan tih theih ang an ti lo va. Hmun kil tak takah ni tin mamawh hrang hrang – ei tur, damdawi, mi tanpuina kan thlenin mi chhanchhuahna hna atan pawh kan che chhuak thin,” tiin an website-ah pawh an tar lang a ni.
Airline hian STOL thlawhna pasarih an nei a, hengte hi Twin Otter (DHC 6/300) panga leh Dornier (DO 228) thlawhna pahnih a ni.