India hmar lam, Punjab-a hriat hlawh tak chu sorkarin venhimna a pek thin a hlih tuk chiahah thah a ni a, he thil thleng hian mi tam tak a tithinrim hle.
Shubhdeep Singh Sidhu-a hi Sidhu Moosewala tia hriat lar a ni a, tunge a nih hriat lohvin Pathianni khan Mansa district-a a zin chu a kap hlum a, kum 28 mi a ni.
Mi dang pahnihin he beihnaah hliam an tuar bawk.
Tualthahna thleng hi an state-ah chuan politics-a inbeih nan an hmang zui nasa hle a, epute chuan sorkar leh police nasa takin an dem.
State police chief VK Bhawra chuan Canada-a inkhuar gangster-in he thil hi a tih niin a chhal tih Pathianni khan a sawi.
Moosewala-a chhungte erawh chuan engmah chhui chianna awm si lova Bhawra-a’n mi sual pawl (gang) inhuatna avanga thah anga a sawi mai chu ngaihdam dil ngei turin an phut ve thung.
Thawhtanni khan Bhawra chuan a thil sawiah hian Moosewala chu ‘gangster a ni emaw, gangster-te zinga inziak lut ve emaw’ tiin a sawi lo hrim hrim niin a sawi thung.
“Lawrence Bishnoi gang hnuaia Goldy Brar chuan an tihah an chhal a, he tualthahna hi kil tin atangin kan chhui a ni,” a ti a. A thil sawi hmasak chu chanchinbuten dik tawk lovin an tar lang niin a sawi bawk.
Punjab Chief Minister Bhagwant Mann chuan high court judge kaihhruaina hnuaia chhuina tur thupek a chhuah tawh.
Eltute chuan engvanga zai thiam venhimna pek thin chu sorkarin hnuh kirsak ta nge an nih an zawt nasa hle.
Police chuan Moosewala hi commando paliin an ven thin chu pahnihah tihtlemsak a nih tawh thu an sawi a, thah a nih tum hian pahnihte erawh an zin tel lo.
Moosewala hi Punjab sorkarin tun hnaia mi 400 chuang venhimna pek thin a hlih leh a tihtlemsak zinga mi a ni.
Mann chuan hetianga mi eng emaw zat venhimna tihtlem leh hnuh kirsak an nih hi a kaihhruai sorkarin ‘VIP culture’ tia an sawi thin titlema mi tute pawh mi pangngai anga awm tura hma an lakna a nih thu a sawi.
Police thuneitute chuan Indian sipaiten kum 1984-a Sikh sakhaw hmun thianghlim ber an luhchhuahna, Operation Blue Star champha lo thleng turah pawh venghimtu tam zawk an ruahman tih an sawi a; mahse, hetih lai hian sorkarin venhimna a hlihsakte hming chu social media-a a darh a, hei hian sawi a hlawhin an nunna atan a hlauhawm thei dawn nia ngaihna a pian phah nasa hle.
Mann chuan Moosewala thah a ni chuan a barakhaih hle a, a titute hrem ngei an nih tur thu a sawi a. An state hmun thenkhata he thihna thleng avanga lungawi lohna lantirtute pawh muanawm taka awm zawk turin a ngen bawk.
Congress hruaitu, Rahul Gandhi chuan Moosewala thah a nih chuan a barakhaihin pawi a ti tak zet tih a sawi a. Nikum khan an party a zawm nghe nghe.
BJP hruaitu, Manjinder Singh Sirsa pawhin Union Home Minister Amit Shah chu venhimna pek thin hlihsakte hming list a darh chungchanga inrawlh turin a ngen.