United States sorkar chuan hmun hla taka mi kap thei multiple-rocket system (MLRS) chu Ukraine hnenah a thawn hnai tawh hle niin a lang ta.
Russia chuan hetiang thawm awm hi boruak duhawm lo awm mek tipunluntu mai a nih thu a sawi ve mek bawk.
President Volodymyr Zelensky leh Ukrainian thuneitute chuan Russia-in an ram khawchhak lam, Donbas region-a bomb nasa lutuk chhan let thuai theih nan MLRS chu andawn thuai thuai an nghakhlel hle bawk.
Russia hian Severodonetsk leh Donbas-a hmun dang dangte chu rocket, tank leh thlawhna hmangin a kap chhunzawm zel.
Kyiv sipaite hian US-in an thawn tho, M777 howitzer pawh an hmang mek sa a, hei hi km 25 vela hla kap phak a ni a. MLRS hi an nei thei a nih chuan hei aia hlaa mi pawh an kap phak tawh dawn a ni.
M270 MLRS battery hian a thawk na thei hle a, km 300 vela hlaa mi pawh a kap fuh thei a. Hetih rual hian hmun hnai zawk, km 70 vela hlaa mi lek pawh a kap thei tho bawk a ni.
Ukraine hnena rocket tenau zawk pek hi US chuan an buaina tipunlun zel tur danna ni theiah a ngai a, hetih rual hian Ukraine ralthuamte chu tihchak ve zel a tum bawk.
Washington Post chanchinbuin US hotu lian pakhat thu sawi a chhuahah White House chuan Ukraine hnena MLRS pek hi a thuphungin a pawm tawh a; mahse, he ralthuamin a kah hlat theih ber ang kap thei ang chi erawh ni rih lo se an ti niin a tar lang a ni.
A kap hla thei ang ber chi an pea Ukraine-in Russia ram chhung a kap hlauh a nih chuan US leh Nato-a a thawhpuite leh Moscow inkar tikhi zualtu mai a nih an hlau a ni.
UK pawhin MLRS hi a nei a. Prime Minister Boris Johnson chuan Ukraine chuan ‘nunrawng lutuk Russian laipuite laka an inven nan’ rocket an mamawh niin a sawi tawh a; mahse, an pe dawn tih erawh a sawi tel lo thung.
US hian MLRS hi 1990-91 Gulf War leh kum 2003 khan an bitum Iraqi-te hmun chhut nan a hmang nasa a, a hlawhtlinpui hle a ni.