Ni thum awh tur Horticulture Fair chu nimin khan Aijal Club park-ah Chief Minister Zoramtha- nga’n a hawng a. Hawnna inkhawm RB McCabe Hall, Aijal Club-a neiah district tina loneitu thawk tha thlan pakhat theuh te hnenah Best Horticulture Farmer lawmman hlan a ni.
Chief Minister chuan kuthnathawkte leh horticulture department-a thawktute chu Mizoram economy hmasawnna atana pawimawh tak an nih thu sawiin, hmalakna tur ruahmanna an siamah uluk taka ngaihtuahna seng turin a chah a. Mizoramin ‘asset’ a neih sa hmanga economy khaikanna tur remchang a neih langsar ber pakhat chu ‘agro-forestry’ nia sawiin, hemi kawnga hma la tura pawimawh a tih te a sawi.
Hmalakna zawng zawng sorkar tih tura dah lova, a tam thei ang ber privatization mode-a kalpuia, sorkarin mimal emaw pawl hmalakna chu a theih chin chinah a puih tur thu Chief Minister chuan a sawi a. Mahni chhungkaw kham khawp thara intodelha duhtawk lova sum a chan tham law law-a tam thar te; chutianga tam thar tura mihring tha hautak lutuk tur chhawk tura a theihna apianga khawl hman te pawimawh a tih thu a sawi.
Chief Minister chuan market zawn chungchangah state chh- ung mipui chawmtu tur state chhung market leh hlawkna tak tak tel theihna tur state pawn market a awm thu sawiin, state pawna hralh tur chungchangah a kaihhnawih deptt. ten ngaihtuahna uluk taka an sen a tul thu a sawi bawk.
Mizoram dist tina loneitu thawk tha thlan Best Horticulture Farmer lawmman dawngtute : Aizawl District : Lalrinpuii, Saikhamakawn; Lunglei District: L. Lalrinmawia, Ramthar, Lunglei; Siaha District: Zoro B. Khehpha, Laki, Siaha; Ch- amphai District: HS Vanlalfakzuala, Champhai Vengthlang; Kolasib District: Liandawla, Kawnpui Hmar Veng; Serchhip District: Vanlaluaia, Serchhip, Dinthar; Lawngtlai District: Uboasulua, Tuikhurhlu, Lawngtlai; Mamit District: H. Rozuala, Lengpui Model veng; Saitual District: Lalzamliana, Mualpheng; Khawzawl District: C. Lalro- rela, Sialhawk; Hnahthial District: H. Lalnunmawia, Chanmari, Hnahthial te an ni. Best State Horticulture award pawh a vawikhatna atan siam niin, Tualte Tomato Gwower Co-operative Society-in an dawng a ni.