Hurricane Agatha-in Mexico-a Oaxaca state a nuaiah mi 11 an thi a, mi dang 20 chuang an chin hriat loh a ni mek tih state governor chuan a sawi.
Category two huanga mi, Agatha hian Thawhtanni khan vaukam a lut tan a, kum 1949 hnu lama Mexico hrul Pacific tuipui kama May thlaa thawkah chuan a na ber a ni.
Ruah tam tak a ken tel avangin lei min leh tui lian pawh a siam nasa hle.
Thi tam zawk pawh hi luiin a lak leh lei tawlhin a chhilhte an ni.
Agatha hian Mexico vaukam hi Puerto Ángel bulah, darkar khata km 169 vela chakin khawmual a kai a, ram ril a thlen hnuah erawh a chakna hi nasa takin a hloh nghal a ni.
Thli hi na zui lutuk lo mah se ruah sur nasa chuan lui tilianin tlangte pawh a timin a. Oaxaca Governor Alejandro Murat chuan mi panga chu lui lian hian a la niin a sawi.
Tlangranga khuate chu a tuar na ber an ni a. Santa Catarina de Xanaguía mayor chuan ft 6,500 vela sanga awm an khua chu a chhe nasa hle tih a sawi.
“Tlawhpawh theih kan ni lo va, power kan nei lo va, kawng leh chenna in tam tak a chhia a ni,” tiin Mayor Ramos chuan a sawi.
Tual chhung chanchinbute chuan tlangrama khuaten chhiat an tawh dan hi social media-ah an tar lang bawk.
Santiago Xanica hian puih an ngaih thu sawiin a mi chengten tui in tur, ei tur leh thawmhnaw bakah nau pai mekte tan damdawi an mamawh hle tih an sawi.
An khuaa thuneitute chuan an lei rinpui ber a chhia a, hei vang hian Santiago Xanica chu thlawhna hmang chauhvin a luh theih rih tih an sawi a. Mi paruk an thi a, mi dang 10 chin an hre lo mek tih an sawi bawk.
US weather service-a scientist-te chuan kumina hurricane season an thlen turah kum dang aia tam thawk thei a awm a, storm, hurricane leh major hurricane an tih tam tak a inmung niin an sawi.
Tun hnaiah khan Brazil hmarchhak lama ruah nasa tak surah Recife khawpuiah mi 100 chuang lei min leh chirh tawlh avangin an lo thi tawh bawk.
Chhanchhuah hna thawktute chuan chin hriat lohva awmte an la zawng mek zel a. Chenna in chhe tak taka awmte chu lei minin a hnawl nasa hle a ni.
Chhanchhuah hna thawkin mi 1,200 chu lawngleng leh helicopter hmangin an che mek.