Aizawl: Lungleng-I Village Council leh NGO hruaitute thukhawm chuan Pathiannia Serchhip Dinthar venga Rosangzuali thattua puh chu danin a phut angin hremna na thei ang ber hmuh theih nan thuneituten chak takin hma la turin an ngen.
Nimin khan thuchhuah siamin, Rosangzuali d/o Kapliana, Lungleng-I pasal, Zobiaksanga s/o P.C.Vanlalawia, Serchhip- Dinthar Veng, kut tuara a tualthihna an dem tak zet thu leh nunrawnna thil thleng hi hriatthiam har an tih thu an sawi a. Tualthattu hian danin a phut ang hremna na thei ang ber a hmuh ngei theih nan thuneituten chak taka hma la turin an ngen tih an sawi.
He tualthihna avang hian eng buaina dang mah thleng zui lo se, media lamah pawh thu belh chian dawl lo leh mi rilru a tha lo zawnga hruai thei thil engmah chhuah loh ni se, mi pakhat thil sual tih avanga tisual ve lo mi dang dem emaw, mawi lo taka tawng khum emaw hi tha an tih loh thu an sawi a. Tun hnuah mahni kawppuite chunga kut thlak emaw, rawng taka inthahna emaw hi thleng tawh lo se, tiin, “He tualthihna atang hian mipate hi hmeichhe awm nem zawkte venghimtu leh thlamuantu ni thei zel turin Zoram mipuite kan inngen thar duh a ni,” an ti bawk.