Aizawl: New Delhi-a cham mek, Dr R. Lalthangliana, Higher & Technical Education, Health & Family Welfare leh Commerce & Industries changtu minister chuan sorkar laipui a dawr chhunzawm zel.
Dr Thangtea hian Thawhlehni chawhnu khan K Sanjay Murthy, Secretary, Deptt. of Higher Secretary, Ministry of Education a hmu a, Mizoram University Southern campus chungchang thil pawimawh a sawipui a. Thil a inchiah rei tawh thu sawiin hmanhmawh taka ching fel thuai turin a thlen.
RUSA mission chungchanga harsatna tawh mek te, RUSA zirtirtu Asst. Professor te hlawh vawiin thlenga pending la awm chungchang te, RUSA-3 tihhlawhtlinna tur atana chin fel ngai an la tifel thei lo chu a ngaihmawh thute a hrilh a, Murthy hian a theih anga en zui a tum thu a lo hrilh.
Hei bakah hian RUSA Mission Director Saumya Gupta, IAS leh Kamini Chauhan, Jt. Secretary, RUSA pawh an office-ah hmuin RUSA chungchanga Mizoramin harsatna a tawh a sawipui leh a. Lengpuia NIT dinna tur atana thil la chin fel lohte pawh thlen lehin a rang thei ang bera tifel turin a ngen a, theihtawp chhuahpui an lo tiam a ni.
Dr. Thangtea hian tlai lamah Drug Controller General of India Dr. V.G.Somany chu a office-ah hmuin Mizoram atanga hmalak dan tur chi hrang hrang – damdawi chiangkuang lo leh damdawi thi tawh, Myanmar ramri leh Bangladesh ramri dep atanga Mizorama rawn tawlh luh ruk leh hralh ruk chungchang a sawipui a, hemi chungchangah hian Mizoram chhungah ngei central team kala awareness leh training pe turin a ngen a. A tul anga hma lak zui a tum thu lo sawiin Mizorama drug administration kalpui dan chungchangah drug controller hian ruahmanna tha zawk leh thurawn tha tak tak Dr.Thangtea hi a pe.
Nilaini chawhma khan Dr. R.Lalthangliana hian Bangladesh High Commissioner to India Muhammad Imran chu a office chamber-ah a tlawh a. Tun hnaia Union Minister of Commerce, Bangladesh Tipu Munshi nena border trade chungchang an sawi dunnaa Bangladesh sorkarin an tihfel tur thil chi hrang hrang awmte chu Imram hian a tul anga hma a lo lakzui tur thu Dr.Thangtea chu a lo hrilh a, theihtawp chhuaha hmalakpui a tum zel thu a lo hrilh a ni.
Hemi zawh hian Dr Thangtea chuan Home Affairs Ministry tlawhin Piyush Goyal, Addl.Secy (NE) a hmu a, Kawrpuichhuah border trade chungchang sawipuiin hemi atana DPR Land Port Authority of India-in an siam anga pawisa sanction rang turin a ngen a. Goyal-a chuan hemi chungchangah hian an hotu sang lamin tihlawhtling tura thutlukna an lo siam tawh angin harsatna awm lo turah a ngaih thu Dr.Thangtea hi a lo hrilh a, theihtawp chhuahpui a inhuam thu a lo hrilh a ni.
Ani bakah hian home affairs ministry-a hotu pawimawh dang, Sunil Kumar Barnwal, Jt. Secretary (BM-II) leh Ashish Kumar, Jt.Secretary (BM-I) chu a khawihtute tak an nih avangin an office-ah a hmu leh a, Kawrpuichhuah atanga Thekamukh, Bangladesh inkalpawhna tur lei dawh chungchang chu rang taka hma la turin minister hian a thlen leh a. Kawrpuichhuah tihchangtlunna tur atana DPR chi hrang hrang Land Port Authority of India in Home Affairs Ministry sanction tura an thehluh tawh, Addl.Secretary (NE), Home Affairs Ministry hnena thleng tawh chu anni pahnih hi a khawitu tak an nih angin bawhzui chak turin a ngen a, anni pawhin theihtawp chhuaha tan an lak tur thu leh harsatna awm lutuk lovin an tihhlawhtlin thuai an inbeisei thu an lo hrilh.
Siaha leh Lawngtlai District inkalpawhna tur atana Darzokai (Tuipui-D) motor lian kal theih lova motor tê chauh kal theia leidawh tur ruahmanna awm chu a buaithlak thu minister hian a thlen leh a, hei pawh hi theihtawp chhuaha hmalakpui an inhuam thu an lo hrilh a. Mizorama BRTF-ten a hma atang tawha an lo ruahman tawhna en chungin mumal takin Mizoram sorkarin a tha tura an hriat angin hma la tha leh se, an hnenah a rang lama an thawn chuan theihtawp chhuah an inhuam thu Dr.Thangtea chu an lo hrilh a ni.
Dr. Thangtea hian nimin tlai khan Union Minister for Ports, Shipping & Waterways Sarbananda Sonowal leh Union Finance Secretary T V Somathana te a hmu leh bawk.
Dr. R.Lalthangliana hi Amjad Tak, IAS, Resident Commissioner, Mizoram House, New Delhi; Sangchin Chinzah, IAS, Director, Higher & Technical, Govt. of Mizoram Ronald Lalchhuanawma, Asst.Director, Commerce & Industries Department ten an tawiawm a ni.